Karan johar on koffee with karan: డిస్నీ ప్లస్‌ హాట్‌స్టార్‌లో ప్రసారమయ్యే కాఫీ విత్ కరణ్ షోను వీక్షించే అభిమానుల సంఖ్య ఎక్కువనే చెప్పాలి. బాలీవుడ్ ప్రముఖ నిర్మాత, దర్శకుడు, నటుడు కరణ్ జోహార్ హోస్ట్‌గా 2004లో ప్రారంభమైన ఈ షో ఆరు సీజన్లను పూర్తి చేసుకుని, ప్రస్తుతం 7వ సీజన్లో నడుస్తోంది. సినిమాల పరంగా కరణ్ జోహార్ ఎంత పాపులర్‌ అయ్యారో, ఈ షో ద్వారా అంతే ప్రాముఖ్యత సంపాదించారంటే అతిశయోక్తి కాదేమో. అయితే ఈ షోను అభిమానించే వారితో పాటు, విమర్శించే వాళ్ల సంఖ్య కూడా ఎక్కువే. గత కొన్నేళ్లుగా ఈ షోలో ద్వంద్వార్థాలతో పాటు, అంతరంగిక విషయాల ప్రస్తావన ఎక్కువగా వస్తుండటంతో ప్రేక్షకులు ఆగ్రహం వ్యక్తం చేస్తున్నారు. ముఖ్యంగా సోషల్‌ మీడియా వేదికగా కాఫీ విత్ కరణ్ షో ని విమర్శకులు ట్రోల్‌ చేస్తున్నారు.
కరణ్ అతని షోకి వచ్చే బాలీవుడ్ సెలెబ్రిటీలపై నెట్టింట ఛలోక్తులు పేలుస్తున్నారు. కాఫీ విత్ కరణ్కు అడల్ట్‌ షోగా ట్యాగ్‌లైన్‌ ఇవ్వాలనే డిమాండ్లు వినిపిస్తున్నాయి. ఈ నేపథ్యంలో ఒక పత్రికకు ఇచ్చిన ఇంటర్వ్యూలో కరణ్ జోహార్ మాట్లాడుతూ.. 'నా షోపై కొందరు చేస్తున్న విమర్శలకు నేను సమాధానం చెప్పి తీరాలి. ఇటీవల కొందరు సోషల్‌ మీడియాలో నా షో ని తిడుతూ చేసిన రీల్స్‌ ని చూసి నేను ఆశ్చర్యపోయాను. కేవలం వినోదం కోసమే నా షో ఇన్ని సంవత్సరాలుగా నిర్వహిస్తున్నాను. అయితే నా షో పట్ల ద్వేషం చూపించేవాళ్లు ఉన్నారని తెలిసి నేను షాక్‌ అయ్యాను. వాళ్లు కేవలం తిట్టడం కోసమే నా షో చూస్తున్నారని తెలిసింది. వాళ్ల సమయాన్ని నా కోసం కేటాయిస్తున్నందుకు ఆనందంగా ఉంది' అని అన్నారు. ప్రస్తుతం ఈ షోలో షాహిద్‌ కపూర్, కియారా అడ్వానీ పాల్గొన్న ఎనిమిదో ఎపిసోడ్‌ ఆగస్టు 25న విడుదల కానుంది.