Kannappa Movie Cast : టాలీవుడ్ స్టార్ హీరో మంచు విష్ణు డ్రీమ్ ప్రాజెక్ట్‌ 'కన్నప్ప' మూవీ ప్రస్తుతం షూటింగ్ దశలో ఉంది. స్టార్ నటీనటులతో ఎంతో ప్రతిష్టాత్మకంగా తెరకెక్కుతున్న ఈ సినిమా గురించి తాజాగా ఓ అప్డేట్ను మూవీ మేకర్స్ వెల్లడించారు. ఈ సినిమా ద్వారా మంచు మూడో తరం వారసుడు సినీ అరంగేట్రం చేయనున్నారు. విష్ణు తనయుడు అవ్రామ్ ఇండస్ట్రీలోకి ఎంట్రీ ఇవ్వనున్నాడు. అయితే అవ్రామ్ రోల్పై క్లారిటీ ఇవ్వలేదు.
"ఈ సినిమాకు నా జీవితంలో ఎంతో ప్రాధాన్యం ఉంటుంది. నా తనయుడు అవ్రామ్ ఈ చిత్రంలో కీలక పాత్రలో నటించడం నాకు చాలా గర్వకారణం. అవ్రామ్‌తో కలిసి ఈ సినీ జర్నీని ప్రారంభిస్తున్నాను. 'కన్నప్ప' సినిమా ప్రతి ఒక్కరికీ చిరస్మరణీయ అనుభూతిని కలిగిస్తుంది. ఇది మా కుటుంబంలో ఓ కొత్త అధ్యాయానికి నాంది పలుకుతుంది. ఇది కేవలం ఓ చిత్రం మాత్రమే కాదు. ఇది మా కుటుంబం మూడు తరాల కలయికతో వస్తోన్న అరుదైన చిత్రం" అంటూ ట్విట్టర్ వేదిక విష్ణు ఓ పోస్ట్ షేర్ చేశారు.
కథేంటంటే: 'మహాకవి ధూర్జటి రాసిన శ్రీకాళహస్తీశ్వర మహత్యంలోని భక్తకన్నప్ప చరిత్రను ఆదర్శంగా తీసుకుని ఈ సినిమాను రూపొందిస్తున్నాం. కన్నప్ప వృత్తాంతం 2వ శతాబ్దంలో జరిగింది, ప్రస్తుతం ఇక్కడి పరిసరాల్లో ఈ సినిమాను చిత్రీకరించడం వీలుకాదు. అందుకోసమనే ఈ చిత్ర నిర్మాణం కోసం ఆర్నెళ్లపాటు న్యూజిలాండ్కు వెళ్తున్నాం. కన్నప్ప భక్తిని, ఆయన గొప్పతనాన్నీ నేటి తరానికి తెలియజేయాలనే సంకల్పంతోనే ఈ చిత్రాన్ని పాన్ ఇండియా రేంజ్లో రూపొందిస్తున్నాం. భారీ బడ్జెట్‌తో అత్యున్నత సాంకేతిక ప్రమాణాలతోనే ఈ సినిమాను సిద్ధం చేస్తున్నాం' అంటూ హీరో విష్ణు ఇదివరకు ఓ సందర్భంలో చెప్పారు.