Kangana New Movie: బాలీవుడ్ 'క్వీన్‌' కంగనా రనౌత్ ప్రధాన పాత్రలో.. జాతీయ అవార్డుల దర్శకుడు మధుర్ భండార్కర్‌ ఓ కొత్త చిత్రం తెరకెక్కించనున్నారు. వాస్తవిక సంఘటనల ఆధారంగా ఈ సినిమా రూపొందనుందని ఆదివారం ఓ పత్రికకు ఇచ్చిన ఇంటర్వ్యూలో భండార్కర్‌ తెలిపారు. ఉగ్రవాదుల చేతిలో ప్రాణాలు కోల్పోయిన ఓ కశ్మీరీ గాయకురాలి జీవితం ఆధారంగా ఈ ఇది పట్టాలెక్కనుంది. నిర్మాత ఫిరోజ్‌ నడియాద్‌వాలా తెరకెక్కించనున్నట్టు సమాచారం. మరోవైపు కంగనా 'ఎమర్జెన్సీ' షూటింగ్‌తో బిజీగా ఉన్నారు. అందులో తను మాజీ ప్రధాని ఇందిరాగాంధీ పాత్ర పోషిస్తున్నారు.
Mohanbabu Agni Nakashtaram Movie: తన ఆలోచనలతో, ఆదర్శాలతో ఎవ్వరినైనా ఇట్టే ప్రభావితం చేయగల సైకియాట్రిస్ట్‌, ప్రొఫెసర్‌ విశ్వామిత్ర కథేమిటో తెలియాలంటే 'అగ్ని నక్షత్రం' చూడాల్సిందే. మోహన్బాబు, మంచు లక్ష్మీ ప్రధాన పాత్రధారులుగా నటిస్తూ, నిర్మిస్తున్న చిత్రమిది. తండ్రీ తనయలైన ఈ ఇద్దరూ కలిసి నటిస్తున్న తొలి చిత్రమూ ఇదే. విశ్వంత్‌ కథానాయకుడు. ప్రతీక్‌ ప్రజోష్‌ దర్శకత్వం వహిస్తున్నారు. ఆదివారం ఈ సినిమాలోని మోహన్బాబు లుక్‌ని విడుదల చేశారు. ప్రొఫెసర్‌ విశ్వామిత్ర పాత్రలో ఆయన సందడి చేయనున్నట్టు సినీవర్గాలు తెలిపాయి. 'మోహన్బాబు విభిన్నమైన పాత్రలో కనిపించనున్నారు. విడుదలైన లుక్‌ ఆ విషయాన్నే స్పష్టం చేస్తోంది. సముద్రఖని, చైత్ర శుక్ల ఇందులో కీలక పాత్రలు పోషిస్తున్నారు. మలయాళ నటుడు సిద్ధిక్‌ విలన్‌గా నటిస్తున్నార'ని చిత్రవర్గాలు తెలిపాయి. కూర్పు: మధురెడ్డి, సంగీతం: లిజో కె.జోష్‌, ఛాయాగ్రహణం: గోకుల్‌ భారతి.