IMDB Most Anticipated Movies 2024 : ప్రముఖ ఎంటర్‌టైన్‌మెంట్‌ పోర్టల్‌ ఇంటర్నెట్‌ మూవీ డేటాబేస్‌ (ఐఎమ్‌డీబీ) తాజాగా 2024లో మూవీ లవర్స్ ఎదురుచూస్తోన్న ఇండియన్‌ సినిమాల జాబితాను విడుదల చేసింది. ఈ నేపథ్యంలో ప్రతి నెలా ఈ వెబ్‌సైట్‌ను చూసే 20కోట్ల మంది యూజర్ల రియల్‌ పేజ్‌ వ్యూస్‌ ఆధారంగా ఈ లిస్ట్‌ను తయారు చేస్తుంది. ఈ నేపథ్యంలో సోషల్‌ మీడియా వేదికగా ఈ టాప్ 20 సినిమాలను పంచుకుంది. ఇందులో టాలీవుడ్కు చెందిన 5 సినిమాలు ఉండటం విశేషం.
బాలీవుడ్ ప్రముఖ డైరెక్టర్ సిద్ధార్థ్‌ ఆనంద్‌ రూపొందిస్తున్న 'ఫైటర్‌' తొలి స్థానంలో ఉండగా, అల్లు అర్జున్‌ అభిమానులతో పాటు సినీ ప్రేక్షకులు ఎంతగానో ఎదురుచూస్తోన్న 'పుష్ప2' తర్వాతి స్థానంలో ఉంది. ఇక ప్రభాస్ 'కల్కి 2898 ఏడీ' సినిమా ఐదవ స్థానంలో అలాగే తేజ సజ్జా 'హనుమాన్‌' ఏడవ ప్లేస్లో, 'దేవర'(10), 'గుంటూరు కారం' (12) స్థానాలను కైవసం చేసుకున్నాయి. మరోవైపు కోలీవుడ్ స్టార్ హీరో సూర్య బిగ్ ప్రాజెక్ట్ 'కంగువ' తొమ్మిదో స్థానంలో ఉండగా, లోకనాయకుడు కమల్‌హాసన్‌ శంకర్ కాంబోలో తెరకెక్కుతున్న 'ఇండియన్‌ -2' 17లో ఉంది.
అయితే ఈ లిస్ట్లో 'ఫైటర్‌' మూవీ టాప్ పొజిషన్లో ఉండటం పట్ల ఆ మూవీ హీరో హృతిక్ రోషన్ ఆనందం వ్యక్తం చేశారు. "సినిమా రిలీజ్కు మందు ఈ లిస్ట్ రావడం మాకు ఉత్సాహాన్నిచ్చింది. టీజర్‌, ట్రైలర్‌ ఎంతో ప్రేక్షకాదరణ పొందాయి. ఈ చిత్రాన్ని కూడా ఇదే స్థాయిలో ఆదరిస్తారని మేము ఆశిస్తున్నాం. జనవరి 25న థియేటర్లో మీ అందరినీ చూడటం కోసం ఎదురుచూస్తున్నాం" అని హీరో హృతిక్ వెల్లడించారు.