Sharwanand Marriage : టాలీవుడ్ హీరో శర్వానంద్ అతి త్వరలో ఓ ఇంటివాడు కాబోతున్న సంగతి తెలిసిందే. వివాహ బంధంలోకి అడుగు పెట్టబోతున్నారు. రక్షితా రెడ్డి అనే యువతితో ఏడు అడుగులు వేయడానికి సిద్ధమయ్యారు. ఇప్పటికే ఈ జంట నిశ్చితార్థం ఈ ఏడాది ప్రారంభంలో గ్రాండ్గా జరిగింది. ఇరు కుటుంబసభ్యులు, సినీ ప్రముఖుల సమక్షంలో వీళ్లిద్దరూ ఉంగరాలు మార్చుకున్నారు. అయితే వీరిద్దరి పెళ్లి క్యాన్సిల్ అయిందంటూ ఇటీవలే పుకార్లు కూడా వచ్చాయి. అయితే, వాటిని హీరో టీమ్ కూడా ఖండించింది. ఇప్పుడు తాజాగా వీరి పెళ్లి డేట్‌ను కుటుంబ సభ్యులు ఖరారు చేశారు. దానికి సంబంధించిన వివరాలను తెలిపారు.
డెస్టినేషన్ వెడ్డింగ్.. శర్వానంద్ డెస్టినేషన్ వెడ్డింగ్ చేసుకోనున్నారట. అయితే ఈ వెడ్డింగ్ ఈవెంట్ విదేశాల్లో కాదు ఇక్కడేనట. రాజస్థాన్‌లోని జైపుర్‌లో ఉన్న లీలా ప్యాలెస్‌లో వీరి వివాహాం జరగనున్నట్లు కుటుంబ సభ్యులు తెలిపారు. జూన్‌ 2, 3 తేదీల్లో గ్రాండ్గా వివాహ వేడుకలను నిర్వహించనున్నట్లు వెల్లడించారు. ఇక ఈ వెడ్డింగ్ ఈవెంట్కు స్నేహితులు, ఇండస్ట్రీలోని సినీ ప్రముఖులకు ఆహ్వానం అందనున్నట్లు సమాచారం. మెగా పవర్ స్టార్ రామ్ చరణ్-ఉపాసన దంపతులతో పాటు పలువురు ప్రముఖులు పెళ్ళికి హాజరు కానున్నారట. కాగా, పెళ్లి తేదీలను ఖరారు చేయడం వల్ల.. ప్రస్తుతం సోషల్‌ మీడియాలో శర్వానంద్ పేరు ఫుల్ ట్రెండ్‌ అవుతోంది. దీంతో కాబోయే నూతన వధూవరులకు నెటిజన్లు శుభాకాంక్షలు చెబుతున్నారు.