రూ.1200తో మొదలైన హీరోయిన్ - అంబానీ కంటే ముందే "రోల్స్‌ రాయిస్‌" కొనేసింది!

First Indian Actress Own Rolls Roys Before Mukesh Ambani : భారతదేశంలో అత్యంత సంపన్నుడైన ముఖేశ్‌ అంబానీ కంటే ముందే.. విలాసవంతమైన రోల్స్‌ రాయిస్‌ కారును కొనుగోలు చేసిందో నటి! దేశంలో ఈ కారు కొన్న మొదటి నటి కూడా ఆమే! అయితే.. ఆమె శ్రీదేవి కాదు, షబానా కాదు.. మరి, ఇంతకీ ఆ స్టార్ ఎవరో మీకు తెలుసా..?

First Indian Actress Own Rolls Roys Before Mukesh Ambani : ప్రపంచంలోనే అత్యంతలగ్జరీ కార్లలో రోల్స్‌ రాయిస్‌ కారు మొదటి స్థానంలో ఉంటుంది. సంపన్నులు ఈ కారును స్టేటస్‌ సింబల్‌గా చూస్తారు. అయితే.. ఆ కారులోని సౌకర్యాలకన్నా.. బ్రాండ్​కే వాల్యూ ఎక్కువ. ఎందుకంటే.. రోల్స్‌ రాయిస్‌ కారును ఎవరికి పడితే వారికి అమ్మరు. నిజాయతీగా, కష్టపడి సంపాదించిన వారికీ మాత్రమే విక్రయిస్తుంది కంపెనీ. అటువంటి కారును.. ఓ హీరోయిన్ దశాబ్దాల క్రితమే కొనుగోలు చేశారు. భారత దేశంలో అత్యంత సంపన్నుడైన ముఖేశ్ అంబానీ కంటే ముందే.. సొంతం చేసుకోవడం విశేషం. ఈ కారును కొనుగోలు చేసిన మొట్టమొదటి భారతీయ నటిగా ఆమె రికార్డ్ సృష్టించారు. ఇంతకీ.. ఆమె ఎవరో తెలుసా? అలనాటి బాలీవుడ్ స్టార్ హీరోయిన్ "నదిరా".

నదిరా 1932 ఇరాక్‌లో జన్మించారు. ఈమె పూర్తి పేరు ఫ్లోరెన్స్ ఎజెకిల్ నదిరా. ఆమె కుటుంబం బాగ్దాద్‌ నుంచి ముంబయికి వలస వచ్చింది. అలా.. నదిరా చిన్నతనంలోనే హిందీ చిత్రపరిశ్రమలోకి అడుగుపెట్టింది. పది సంవత్సరాల వయస్సులో హిందీ చిత్రం మౌజ్‌లో (1943) మొదటిసారిగా నటించింది. ఈ చిత్రంలో నటించినందుకు నదిరా పారితోషికంగా రూ.1,200 తీసుకున్నారు.

హీరోయిన్​గా హవా..

నదిరా

హిందీ చిత్రం 'ఆన్‌' (1952)తో బాలీవుడ్‌ కు నదిరా హీరోయిన్‌గా పరిచయం అయ్యారు. ఇందులో నదిరా రాజపుత్ర యువరాణిగా ప్రేక్షకులను అలరించారు. 'ఆన్‌' సినిమా ప్రపంచ వ్యాప్తంగా 28 దేశాల్లో 17 భాషల్లో విడుదలై, ఆ కాలంలో.. అత్యధిక వసూళ్లను సాధించిన చిత్రంగా నిలిచింది. ఈ మూవీ తరువాత నదిరాకు అవకాశాలు వెల్లువెత్తాయి. 1950 నుంచి 1960 మధ్య అత్యధిక పారితోషికం తీసుకున్న నటిగా నదిరా రికార్డ్ సృష్టించారు. శ్రీ 420, దిల్ అప్నా ఔర్ ప్రీత్ పరాయి, పాకీజా, హంస్తే జఖ్మ్, అమర్ అక్బర్ ఆంథోనీ.. వంటి ఎన్నో సూపర్‌ హిట్‌ సినిమాల్లో నటించారు. దాదాపు 60 కు పైగా హిందీ చిత్రాల్లో నటించారు.

సహాయక పాత్రల్లో..
60వ దశకం తర్వాత.. ఆమెకు సినిమా ఛాన్సులు తగ్గిపోయాయి. దీంతో.. క్రమంగా వెండితెరకు దూరమయ్యారు. 1980 తర్వాత సహాయక పాత్రల ద్వారా రీఎంట్రీ ఇచ్చారు. నదిరా నటించిన చివరి సినిమా "జోష్‌". 1975లో నటించిన "జూలీ" చిత్రానికి గానూ.. నదిరా బెస్ట్‌ సపోర్టింగ్ యాక్ట్రెస్‌ కేటగిరీలో ఫిలింఫేర్‌ అవార్డ్‌ను అందుకున్నారు. 73 సంవత్సరాల వయస్సులో 2006 ఫిబ్రవరిలో నదిరా మరణించారు.