జూనియర్ ఎన్టీఆర్పై దర్శకుడు రాజమౌళి మరోసారి ప్రశంసలు కురిపించారు. తారక్ గురించి కొన్ని ఆసక్తికర వ్యాఖ్యలు చేశారు. ఇటీవలే ఆయన దర్శకత్వంలో రామ్చరణ్, ఎన్టీఆర్ హీరోలుగా నటించిన ఆర్ఆర్ఆర్ విడుదలై ప్రభంజనం సృష్టించిన సంగతి తెలిసిందే. అన్ని దేశాల్లోనూ రికార్డు స్థాయిలో విజయాన్ని నమోదు చేసింది. ఈ క్రమంలోనే చికాగోలో జరిగిన ఓ కార్యక్రమంలో తారక్ గురించి రాజమౌళి మాట్లాడారు. ఎన్టీఆర్‌కు పనిపై ఉన్న నిబద్ధత, డాన్స్‌పై ఉన్న తపన చూసి తానెప్పుడూ ఆశ్చర్యపోతుంటానని తెలిపారు.
"తారక్ అద్భుతమైన డాన్సర్‌. తనకు ఎక్కువ సాధన చేయాల్సిన అవసరం కూడా లేదు. అయినా, ఆర్ఆర్ఆర్ షూటింగ్‌ అప్పుడు ఎంతో కష్టపడ్డాడు. 12 గంటలు నిరంతరంగా షూటింగ్‌ చేశాక కూడా మళ్లీ రూమ్‌కు వెళ్లి మరసటి రోజు షెడ్యూల్‌ కోసం గంటల తరబడి సాధన చేసేవాడు. జూనియర్ ఎన్టీఆర్ అంటే నాకు అమితమైన గౌరవం ఉంది" అంటూ తారక్‌పై అభిమానాన్ని వెల్లడించారు రాజమౌళి.