'నీ కూతురు ప్రేమించినవాడిని కదా.. నన్ను మెతక అనుకుంటున్నావేమో.. కాస్ట్యూమ్‌, కళ్లజోడు చూస్తే అర్థంకావట్లేదా? మాస్‌.. ఊర మాస్‌' అంటూ తనకు కాబోయే మావయ్యకు వార్నింగ్ ఇచ్చారు కిరణ్ అబ్బవరం. ఆయన హీరోగా నటించిన 'నేను మీకు బాగా కావాల్సినవాడిని' చిత్రంలోని సంభాషణ ఇది. ఈ యాక్షన్‌ ఎంటర్‌టైనర్ ఈ నెల 16 ప్రేక్షకుల ముందుకురానున్న నేపథ్యంలో ప్రముఖ నటుడు పవన్‌ కల్యాణ్‌ ట్రైలర్ను విడుదల చేశారు. చిత్ర బృందానికి శుభాకాంక్షలు తెలిపారు. కూతురు పుడితే కొందరు తండ్రులు ఎందుకు ఆనందంగా ఉంటారో వివరించే సన్నివేశంతో ప్రారంభమైంది ట్రైలర్. కామెడీ, యాక్షన్‌, ఎమోషన్‌.. ఇలా అన్ని అంశాలతో ఈ సినిమా రూపొందినట్టు ట్రైలర్ చూస్తే అర్థమవుతోంది. డ్రైవర్‌, సాఫ్ట్‌వేర్‌ ఇంజినీర్‌ల ప్రేమకథ ఇతివృత్తంగా ఈ చిత్రం తెరకెక్కినట్టు తెలుస్తోంది.
'మగతనం అంటే మామూలుగా ఉన్న అమ్మాయితో మంచిగా ఉండటం కాదు తాగి ఉన్న అమ్మాయితో కూడా మిస్‌ బిహేవ్‌ చేయకుండా ఉండటం', 'అబ్బాయిలు ఇంతగా తాగాలంటే పెద్ద కారణం ఉండాల్సిన అవసరంలేదు. కానీ, ఓ అమ్మాయి ఇంతలా తాగుతుందంటే ఏదో బలమైన కారణమే ఉండాలి' అని కథానాయకుడు చెప్పిన సంభాషణలు యువతను మెప్పించేలా ఉన్నాయి. తమ తమ పాత్రలతో గెటప్‌ శ్రీను, బాబా భాస్కర్‌ నవ్వులు పంచారు. ఈ సినిమాలో కిరణ్ సరసన సంజనా ఆనంద్‌, సోనూ ఠాకూర్‌ సందడి చేయనున్నారు. శ్రీధర్‌ గాదె దర్శకత్వం వహించిన ఈ సినిమాని దివంగత కోడి రామకృష్ణ తనయ దివ్య నిర్మించారు. మణిశర్మ స్వరాలందించారు.
బావీవుడ్ 'విక్రమ్ వేద' ట్రైలర్ రిలీజ్..
"ప్రతి కథలో మంచీ చెడూ ఉంటాయి. కానీ, ఇది ఇద్దరు చెడ్డవారి కథ" అని ప్రేక్షకుల్లో ఆసక్తి పెంచుతోంది 'విక్రమ్ వేద' చిత్ర బృందం. బాలీవుడ్ నటులు హృతిక్‌ రోషన్‌, సైఫ్ అలీఖాన్‌ కలిసి నటించిన సినిమా ఇది. తాజాగా ట్రైలర్ విడుదలై, సందడి చేస్తోంది. ఇందులో.. పవర్‌ఫుల్‌ పోలీసు ఆఫీసర్‌గా సైఫ్, గ్యాంగ్‌స్టర్‌గా హృతిక్‌ కనిపించారు. ఇద్దరి నటన కట్టిపడేసేలా ఉంది. హృతిక్‌ రోషన్‌ లుక్‌ చాలా కొత్తగా ఉంది. యాక్షన్‌ సన్నివేశాలు, నేపథ్య సంగీతం ట్రైలర్‌లో ప్రధాన ఆకర్షణగా నిలిచాయి. మాతృకకు దీటుగా ఈ రీమేక్‌ చిత్రం తెరకెక్కిన్నట్టు ట్రైలర్ చూస్తే అర్థమవుతోంది.
మాధవన్‌, విజయ్‌ సేతుపతి ప్రధాన పాత్రల్లో నటించిన సూపర్‌ హిట్‌ తమిళ చిత్రం 'విక్రమ్ వేద'కు రీమేక్‌ ఇది. మాతృకను తెరకెక్కించిన పుష్కర్‌, గాయత్రి ద్వయమే ఈ హిందీ సినిమాకూ దర్శకత్వం వహించింది. ఎస్‌. శశికాంత్‌, భూషణ్‌ కుమార్‌ నిర్మించారు. రాధికా ఆప్టే కీలక పాత్ర పోషించారు. సెప్టెంబర్ 30న ఈసినిమా ప్రేక్షకుల ముందుకు రానుంది.