CINEMA UPDATES TODAY: దర్శకధీరుడు రాజమౌళి తెరకెక్కించిన ఆర్ఆర్ఆర్ చిత్రం రికార్డులు సృష్టిస్తోంది. కీరవాణి స్వరపరిచిన బాణీలు ప్రేక్షకులను విపరీతంగా ఆకట్టుకున్నాయి. మిలియన్ల వ్యూస్ను సాధిస్తున్నాయి. ఈ సినిమాలోని కొమ్మా ఉయ్యాల పాటకు ఫిదా అయ్యారు అభిమానులు. సినిమా విడుదల తర్వాత ఎక్కువగా ఈ పాట గురించే మాట్లాడుతున్నారు. సినిమా ప్రారంభంలో మల్లీ హమ్ చేసిన ఈ పాటను చిన్నారి ప్రకృతి రెడ్డి ఆలపించింది. అయితే.. తాజాగా ఈ పాట వీడియో సాంగ్ను శనివారం(ఏప్రిల్ 16)న సాయంత్రం 4 గంటలకు విడుదల చేయనున్నట్లు మేకర్స్ పోస్టర్ను విడుదల చేశారు. ఈ పోస్టర్లో ఎన్టీఆర్ కొమురం భీం గెటప్లో మల్లీని భుజాలపై ఎత్తుకుని వెళుతున్న ఫొటో ఆకట్టుకుంటోంది.
'సెల్ఫిష్'గా మారిపోయిన యువ హీరో: ప్రముఖ నిర్మాత దిల్ రాజు కుటుంబంలో నుంచి హీరోగా ఎంట్రీ ఇచ్చాడు ఆశిష్ రెడ్డి. ఈ యువ హీరో నటించిన రౌడీ బాయ్స్ ఈ ఏడాది సంక్రాంతికి విడుదలైంది. తొలి సినిమాతోనే మంచి మార్కులు కొట్టేశాడు ఆశిష్. ఈ యంగ్ హీరో ఇప్పుడు రెండో సినిమాకు సిద్ధమయ్యాడు. సెల్ఫిష్ పేరుతో సినిమాను ప్రకటిస్తూ పోస్టర్ విడుదల చేసింది నిర్మాణ సంస్థ. ఈ మూవీ షూటింగ్ ప్రారంభోత్సవాన్ని శుక్రవారం ఘనంగా నిర్వహించారు. ఈ కార్యక్రమానికి స్టార్ హీరో ధనుష్ ముఖ్య అతిథిగా హాజరయ్యాడు. క్లాప్ కొట్టి షూటింగ్ ప్రారంభించాడు. కిషి విశాల్, దిల్రాజు, మిక్కీ జే మేయర్, సుకుమార్ సహా పలువురు హాజరయ్యారు.
అశోకవనంలో అర్జున కళ్యాణం కొత్త రిలీజ్ డేట్:విద్యాసాగర్ చింతా దర్శకత్వంలో విశ్వక్ సేన్ తదితరులు నటిస్తున్న సినిమా అశోకవనంలో అర్జున కళ్యాణం. ప్రముఖ నిర్మాత బి.వి.ఎస్.ఎన్ ప్రసాద్ సమర్పణలో, ఎస్వీసీసీ డిజిటల్ బ్యానర్ పై నిర్మిస్తున్నారు. జయ్ కృష్ణ సంగీతం అందిస్తున్నాడు. అయితే.. ఈ సినిమాను తొలుత ఏప్రిల్ 22న విడుదల చేయాలని నిర్ణయించింది చిత్రం బృందం. అనుకోని కారణాల వల్ల వాయిదా వేశారు. కొత్త రిలీజ్ డేట్పై శుక్రవారం(ఏప్రిల్ 15న) సాయంత్రం 5 గంటలకు ప్రకటన చేయనున్నట్లు ఓ పోస్టర్ వీడుదల చేశారు.