ఇండస్ట్రీలో మాస్ సినిమాలను తెరకెక్కించడంలో బోయపాటి శ్రీను స్టైలే వేరు. ఆయన రూపొందించే సినిమాలు మాస్ ఆడియెన్స్ను బాగా ఆకట్టుకుంటాయి. ప్రస్తుతం ఆయన ఎనర్జిటిక్ స్టార్ రామ్ పోతినేనితో కలిసి ఓ భారీ యాక్షన్ మాస్ ఎంటర్టైనర్ సినిమా చేస్తున్నారు. శ్రీలీల హీరోయిన్గా నటిస్తోంది. సీనియర్ హీరో శ్రీకాంత్ కీలక పాత్ర పోషిస్తున్నారు. ఈ చిత్రంలో రామ్ను ఇప్పటి వరకూ చూడని రూపంలో మాసీగా చూపించబోతున్నట్లు చిత్రబృందం చెబుతోంది. అయితే నేడు(మార్చి 15) హీరో రామ్ పోతినేని పుట్టినరోజు. ఈ సందర్భంగా మూవీటీమ్ అదిరిపోయే సర్ప్రైజ్ అప్డేట్ ఇచ్చింది. ఫస్ట్ థండర్ పేరుతో ఓ యాక్షన్ గ్లింప్స్ను రిలీజ్ చేసింది. ఇందులో రామ్.. మాసీ లుక్లో ఊరమాస్గా అదిరిపోయేలా ఉన్నారు.
రామ్ ఓ పెద్ద కత్తితో నడుచుకుంటూ వస్తున్న సన్నివేశంతో ప్రారంభమైన ఈ వీడియోలో.. ఆ తర్వాత బాంబు పేలుడు ధాటికి జీపులోని విలన్స్ అంతా కత్తులతో చెల్లాచెదురుగా కింద పడతారు. అనంతరం ఓ జాతరలో దున్నపోతును పట్టుకుని రామ్ పవర్ఫుల్ లుక్లో ఎంట్రీ ఇస్తారు. 'నీ స్టేట్ దాటలేనన్నావ్ దాటా.. నీ గేట్ దాటలేనన్నావ్ దాటా.. నీ పవర్ దాటలేనన్నావ్ దాటా.. ఇంకేంటి దాటేది నా బొంగులో లిమిట్సు...' అంటూ రామ్ చెప్పే డైలాగ్స్ అదిరిపోయాయి. విలన్స్పై రామ్ విరుచుకుపడే విజువల్స్ మరింత ఆకట్టుకుంటున్నాయి. బ్యాక్ గ్రౌండ్ మ్యూజిక్ కూడా హైలెట్గా ఉంది. తెలుగుతో పాటు తమిళ, కన్నడ, మలయాళ, హిందీ భాషల్లోనూ ఈ వీడియోను రిలీజ్ చేశారు.