Bhagvant Kesari 18 Days Collections :నటసింహ నందమూరి బాలకృష్ణ ఆరు పదుల వయసులోనూ వరుస సినిమాలు చేస్తూ అభిమానులను అలరిస్తున్నారు. సూపర్ హిట్ చిత్రాలతో అటు సీనియర్ హీరోలకు, ఇటు కుర్ర హీరోలకు గట్టి పోటీ ఇస్తున్నారు. ఈ మధ్య కాలంలో ఫుల్ ఫామ్‌లో ఉన్న బాలయ్య.. ఇటీవలే 'భగవంత్ కేసరి' చిత్రంతో ప్రేక్షకులు ముందుకు వచ్చారు. ఈ సినిమా బాక్సాఫీసు మందు మంచి టాక్ సంపాదించింది. ప్రారంభంలో మంచి కలెక్షన్లు సాధించింది. అయితే మధ్యలో కాస్త వసూళ్లు నెమ్మదించాయి. అయితే వీకెండ్లో మళ్లీ కలెక్షన్లు జోరందుకున్నాయి. ఈ నేపథ్యంలో 'భగవంత్ కేసరి' సినిమా 18 రోజుల్లో రాబట్టిన వసూళ్ల వివరాలను చిత్ర నిర్మాణ సంస్థ షైన్ స్క్రీన్స్ సోషల్ మీడియా వేదికగా వెల్లడించింది.
'భగవంత్ కేసరి' 18 రోజుల కలెక్షన్స్..
'భగవంత్ కేసరి' సినిమాకు 18 రోజుల్లో మంచి స్పందన వచ్చింది. ఫలితంగా ఇప్పటివరకు ప్రపంచవ్యాప్తంగా రూ.70.01 కోట్ల షేర్ కలెక్ట్ చేసింది. రూ.139.19 కోట్ల వరల్డ్వైడ్ గ్రాస్ వసూలు చేసింది. ఇక ఈ సినిమాకు వరల్డ్వైడ్గా రూ.57.63 కోట్ల థియేట్రికల్ బిజినెస్ జరిగిందని సినిమా నిర్మాణ సంస్థ షైన్ స్క్రీన్స్ సోషల్ మీడియా వేదికగా ప్రకటించింది. దీనిపై సినిమా దర్శకుడు అనిల్ రావిపూడి కూడా స్పందించారు. ' 'భగవంత్ కేసరి'ని మరో మరిచిపోలేని సినిమాలా చేసిన ప్రేక్షకులకు కృతజ్ఞతలు' అని సోషల్ మీడియా ప్లాట్ఫామ్ ఎక్స్లో ట్వీట్ చేశారు.