ద‌ర్శ‌క ధీరుడు రాజమౌళి తెరకెక్కించిన బాహుబలి సిరీస్ ఎంతటి ఘన విజ‌యాన్ని సాధించాయో అందరికీ తెలిసిందే. తెలుగు చిత్రసీమ స్థాయిని.. భారతీయ సినిమాల గొప్పదనాన్ని ప్రపంచానికి చాటి చెప్పాయి. ప్రభాస్, రానా, అనుష్క, తమన్నా ప్రధాన పాత్రల్లో రాజమౌళి తెరకెక్కించిన ఈ దృశ్య కావ్యాలు.. ప్రపంచ వ్యాప్తంగా భారీ వసూళ్లు అందుకున్నాయి. దాదాపు రూ.2 వేల కోట్ల వ‌ర‌కు కలెక్షన్లను సాధించాయి.
సినిమా విడుదలై ఇన్నేళ్లైనా ఈ మూవీ గురించి ఏదో ఒక ఇంట్రెస్టింగ్ వార్త వస్తూనే ఉంటుంది. తాజాగా ఈ మూవీలోని రెండు పాటలకు చెందిన వివ‌రాలు వైర‌ల్ అవుతున్నాయి. అవి తెరకెక్కించడానికి ఎంత ఖర్చు అయిందో తెలిసింది. తొలి భాగంలో అవంతిక‌ను(తమన్నా) వెతుకుతూ శివుడు అలియాస్ మ‌హేంద్ర బాహుబలి(ప్రభాస్) వెళ్తారు. ఆ స‌మ‌యంలో ధీవరా గీతం వ‌స్తుంది. ఆ త‌ర్వాత హీరో హీరోయిన్ ప్రేమలో పడ్డాక పచ్చబొట్టేసిన పాట వ‌స్తుంది. అయితే ఈ పాటలకు చెందిన బడ్జెట్ వివ‌రాలే తెలిశాయి. ఈ రెండు పాటలకు ఒక్కో దానికి రూ.2.50 కోట్ల చొప్పున రూ.5 కోట్లు ఖర్చు చేశార‌ట. అత్యంత అద్భుత‌మైన గ్రాఫిక్స్తో వీటిని రూపొందించారు. ఇవి అభిమానులను బాగా ఆకట్టుకున్నాయి.