సీనియర్ హీరోయిన్ అనుష్క సిల్వ‌ర్ స్క్రీన్‌పై కనిపించి దాదాపు ఐదేళ్లు అయిపోయింది. చాలా గ్యాప్ తర్వాత ఆమె.. మిస్ శెట్టి మిస్టర్ పోలిశెట్టి సినిమాతో ప్రేక్ష‌కులను అలరించనున్నారు. జాతి రత్నాలు ఫేమ్ యంగ్ హీరో నవీన్ పొలిశెట్టితో కలిసి ఆమె నటిస్తున్నారు. రొమాంటిక్ అండ్ కామెడీ ఎంటర్టైనర్గా తెరకెక్కిన ఈ చిత్రానికి మహేష్బాబు.పి దర్శకత్వం వహిస్తున్నారు. యు.వి.క్రియేషన్స్‌ బ్యానర్పై వంశీ - ప్రమోద్‌ నిర్మిస్తున్నారు. దాదాపు చిత్రీకరణ పూర్తి చేసుకున్న ఈ సినిమాకు సంబంధించిన టీజర్‌ను శనివారం విడుదల చేశారు మేకర్స్. ఇందులో నవీన్ పొలిశెట్టి... సిద్ధు పొలిశెట్టి అనే స్టాండప్ కమెడియన్‌ పాత్రలోనూ, కథానాయిక అనుష్క.. అన్విత రవళిశెట్టి అనే షెఫ్‌ పాత్రలోనూ నటించారు. వీరిద్దరి మధ్య కామెడీ కెమిస్ట్రీ ఆకట్టుకునేలా ఉంది. ఈ చిత్రానికి రధన్‌ సంగీతం అందిస్తున్నారు.
చెఫ్‌గా అనుష్క శెట్టి ఎంట్రీ ఇవ్వడంతో ప్రారంభమైందీ ప్రచార చిత్రం. 'ఫుడ్ ఏం మ్యాజిక్ కాదు ఇట్స్ ఏ సైన్స్' అంటూ అనుష్క చెప్పిన సంభాషణతో మొదలైన ఈ టీజర్.. ఆ తర్వాత 'నా కూతురు సామాన్యురాలు అనుకుంటున్నావా.. ఎప్ప‌టికీ పెళ్లి చేసుకోదు' అంటూ అనుష్క గురించి ఆమె త‌ల్లిగా జ‌య‌సుధ డైలాగ్ చెప్పడం ఆస‌క్తిని పెంచింది. ఆ తర్వాత సిద్ధు అనే స్టాండప్ క‌మెడియ‌న్‌గా నవీన్ పొలిశెట్టి కనిపించి ఆకట్టుకున్నారు. తన మార్క్ టైమింగ్ కామెడీ, పంచ్ డైలాగ్స్తో నవ్వులు పూయించారు. టీజ‌ర్‌కు ఇవే హైలైట్‌గా నిలిచాయి.