Animal Movie Promotions Sandeep Reddy Vanga : ప్రస్తుతం ఎక్కడ చూసినా 'యానిమల్' గురించే చర్చ నడుస్తోంది. తెలుగు డైరెక్టర్ సందీప్ రెడ్డి వంగ తెరకెక్కించిన ఈ సినిమాలో బాలీవుడ్ నటుడు రణ్బీర్ కపూర్ హీరోగా నటించారు. రణ్బీర్ సరసన 'నేషనల్ క్రష్' రష్మిక మందన్న ఆడిపాడింది. బాలీవుడ్ స్టార్ నటులు అనిల్‌ కపూర్, బాబీ దేవోల్‌ కీలక పాత్రలు పోషించారు. ఈ సినిమా డిసెంబరు 1న .. హిందీతో పాటు తెలుగు, తమిళ్, మలయాళం, కన్నడ భాషాల్లో విడుదల కానుంది. ఈ నేపథ్యంలో చిత్ర యూనిట్ ఇప్పటికే ప్రమోషన్స్ను ప్రారంభించింది. అందులో భాగంగానే రణ్బీర్, రష్మిక, బాబీ దేవోల్‌ తదితరులు చెన్నైకి వెళ్లారు. అక్కడి అభిమానులు, మీడియాతో ముచ్చటించారు.
ఈ సందర్భంగా మీడియా ప్రతినిధులతో మాట్లాడారు రణ్బీర్. యానిమల్ సినిమా కథ చాలా క్లిష్టమైందని.. అందులో తన పాత్ర ఎన్నో ఎమోషన్స్‌తో కూడుకున్నదని చెప్పారు. మిగతా పాత్రలు కూడా క్లిష్టమైనవే అని తెలిపారు. 'ప్రేక్షకులు తప్పకుండా ఈ క్యారెక్టర్లను, మూవీని ఆస్వాదిస్తారనే నమ్మకం ఉంది. సందీప్ రెడ్డి ఒరిజినల్ డైరెక్టర్.' అని ప్రశంసించారు.
అయితే ఇటీవల యానిమల్ ట్రైలర్‌ విడుదల చేశారు. అందులో వార్ మెషీన్ సీక్వెన్స్ అందరి దృష్టిని ఆకర్షించింది. దానిపై విలేకరి అడిగిన ప్రశ్నకు రణ్బీర్ బదులిచ్చారు. 'ప్రొడక్షన్‌ డిజైనర్‌, ఆర్ట్‌ డైరెక్టర్ సెల్వరాజన్‌ దాన్ని చూపించగానే షాక్‌ అయ్యా. అందుబాటులో ఉన్న వస్తువులతో.. ఒరిజినల్ వార్ మెషీన్‌ను తలపించేలా తీర్చిదిద్దారు. సందీప్, సెల్వరాజన్‌లకు వచ్చిన గ్రేట్‌ ఐడియా అది' అని చెప్పారు. కోలీవుడ్‌ గురించి రణ్బీర్ ప్రత్యేకంగా మాట్లాడారు. విక్రమ్‌ (కమల్‌ హాసన్‌ హీరో), జైలర్‌ (రజనీకాంత్‌ హీరో), లియో (విజయ్‌) తనకు బాగా నచ్చిన సినిమాలని తెలిపారు.