ఆస్కార్​ రేసులో అలియా భట్​ సినిమా

సినీ ప్రపంచంలో ప్రతిష్ఠాత్మకంగా భావించే 'ఆస్కార్‌' వేదికపై ఈసారి భారతదేశం నుంచి పోటీ గట్టిగానే ఉండనున్నట్లు తెలుస్తోంది. రాజమౌళి తెరకెక్కించిన 'ఆర్‌ఆర్‌ఆర్', శ్యామ్​సింగరాయ్​ వంటి చిత్రాలు ఈ ఏడాది ఆస్కార్‌ బరికి నామినేట్‌ అయ్యే అవకాశం ఉందని ఇటీవలే వార్తలు రాగా.. ఇప్పుడు, మరో బీటౌన్‌ సినిమా పేరూ వినిపిస్తోంది. అలియా భట్‌ ప్రధాన పాత్రలో నటించిన ఓ సినిమా ఈసారి ఆస్కార్‌ రేసులో ఉండే అవకాశం ఉందని బాలీవుడ్‌ మీడియా కోడైకూస్తోంది. ఇంతకీ ఆ సినిమా ఏమిటి? దాని విశేషాలేమిటి?

ఈ సారి ఆస్కార్​ రేసులో ఇండియన్​ సినీ ఇండస్ట్రీని నుంచి గట్టి పోటీ ఉండనుందా అంటే అవుననే వార్తలు సోషల్​మీడియాలో ఎక్కువ కనిపిస్తున్నాయి. ఎందుకంటే ఇటీవలే రాజమౌళి ఆర్​ఆర్​ఆర్​, నాని శ్యామ్​ సింగరాయ్​ ఈ ప్రతిష్టాత్మక అవార్డు రేసులో ఉన్నట్లు వార్తలు వచ్చాయి. ఇప్పుడు మరో హిందీ సినిమా పేరు వినిపిస్తోంది. అదేంటంటే..

ముంబయి మాఫియా క్వీన్‌ గంగూబాయి జీవితాన్ని ఆధారంగా చేసుకుని తెరకెక్కిన చిత్రం 'గంగూబాయి కతియావాడి'. గంగూబాయిగా అలియా నటించారు. సంజయ్‌ లీలా భన్సాలీ దర్శకత్వం వహించిన ఈ సినిమా 2022 ఆరంభంలో విడుదలై మంచి టాక్‌ అందుకుంది. అలియా నటనకు సినీ విమర్శకులు సైతం ఫిదా అయ్యారు. విదేశాల్లోనూ ఈ సినిమా మంచి వసూళ్లు రాబట్టింది. ఇక, బెర్లిన్‌ ఫిల్మ్ ఫెస్టివల్‌లో దీన్ని ప్రదర్శించగా ప్రేక్షకులందరూ కరతాళధ్వనులతో ప్రశంసించారు. ఈ నేపథ్యంలోనే 'గంగూబాయి కతియావాడి' ఆస్కార్‌కు వెళ్లే అవకాశం ఉందంటూ బాలీవుడ్‌ మీడియాలో తాజాగా వార్తలు వస్తున్నాయి. అలియా నటన, విదేశాల్లో సినిమాకు లభించిన గుర్తింపు.. ఇలాంటి అంశాలు అందుకు దోహదపడుతున్నాయని ఆయా కథనాల్లోని సమాచారం. ఈ వార్తలు చూసిన అలియా అభిమానులు ఆమెను మెచ్చుకుంటూ పోస్టులు పెడుతున్నారు. ఇక, సంజయ్‌ లీలా భన్సాలీ రూపొందించిన 'దేవదాస్‌' గతంలో ఆస్కార్‌కు నామినేట్‌ అయిన విషయం తెలిసిందే.

ఇదీ చూడండి: స్టేజ్‌పై అభిమాని కాళ్లకు నమస్కరించిన స్టార్​హీరో, ఎందుకంటే