Adipurush Pre Release Event : పాన్ ఇండియా స్టార్ ప్రభాస్ కథానాయకుడిగా ఓం రౌత్‌ దర్శకత్వంలో తెరకెక్కిన మైథలాజికల్‌ డ్రామా ఆది పురుష్‌. రామాయణానికి ఆధునిక హంగులు జోడించి ఈ సినిమాను తీర్చిదిద్దారు. రాఘవుడిగా ప్రభాస్, జానకిగా కృతి సనన్‌ కీలక పాత్రలు పోషించారు. లంకేశ్‌గా సైఫ్‌ అలీ ఖాన్‌ కనిపించనున్నారు. అన్ని కార్యక్రమాలు పూర్తి చేసుకున్న ఈ సినిమా జూన్‌ 16న ప్రేక్షకుల ముందుకు రానుంది. ఈ సందర్భంగా తిరుపతిలో భారీ ప్రీరిలీజ్ ఈవెంట్‌ను నిర్వహిస్తున్నారు. ఇంతకు ముందెన్నడూ జరగని రీతిలో చిత్ర నిర్మాణ సంస్థ ఏర్పాట్లు చేసింది. అంతేకాదు ఇంత భారీ స్థాయిలో చేస్తున్న ఈ ప్రిరీలీజ్‌ వేడుకకు కొన్ని ప్రత్యేకతలు కూడా ఉన్నాయి.
- ఆది పురుష్‌ ప్రీరిలీజ్ వేడుకకు ప్రముఖ ఆధ్యాత్మిక వేత్త చినజీయర్‌స్వామి ముఖ్య అతిథిగా హాజరుకానున్నారు.
- సినీ చరిత్రలోనే తొలిసారి 50 అడుగుల ప్రభాస్ హాలోగ్రామ్‌ ప్రదర్శించనున్నారు.
- అయోధ్యను తలపించేలా తిరుపతిలో భారీ సెట్ వేశారు. శ్రీరాముడు, వేంకటేశ్వరస్వామి రెండూ శ్రీమహావిష్ణువు అవతారాలే. దాన్ని దృష్టిలో ఉంచుకునే అటు అయోధ్య, ఇటు తిరుపతిల మధ్య ఆధ్యాత్మిక బంధాన్ని తలపించేలా ఈ సెట్‌ను తీర్చిదిద్దారు.
- 100 డ్యాన్సర్లు, 100మంది గాయనీ గాయకులు ఆదిపురుష్‌తో పాటు, రామాయణానికి సంబంధించిన గీతాలను ఆలపించనున్నారు.
- డైరెక్టర్ ప్రశాంతవర్మ పర్యవేక్షణలో ఈ కార్యక్రమాన్ని నిర్వహిస్తుండటం గమనార్హం.
- ఈవెంట్కు లక్షమంది వచ్చినా ఇబ్బంది లేకుండా ఉండేలా ఏర్పాట్లు చేస్తున్నారు.
-
తిరుపతి శ్రీ వేంకటశ్వర యూనివర్సిటీ మైదానంలో నిర్వహిస్తున్న ఈవెంట్ సీటింగ్‌ను పలు విధాలుగా విభజించారు. స్టేజ్‌కు ముందు వరసను అయోధ్యగా పేర్కొనగా, ఆ తర్వాత భాగాన్ని మిథిలగా, ఆ తర్వాత పంచవటి, దాని వెనుక గ్యాలరీకి కిష్కింద అని పేర్లు పెట్టారు.
ఈవెంట్ సీటింగ్‌ ప్లాన్
-
ఈ సినిమాకు బాలీవుడ్‌ సంగీత ద్వయం అతుల్‌-అజయ్‌లు స్వరాలు సమకూర్చారు. వీరిలో అతుల్‌ ముంబయి నుంచి తిరుపతికి బైక్‌పైన వచ్చారు. శనివారం ముంబయిలో బయలుదేరిన ఆయన సోమవారం తిరుపతి చేరుకున్నారు. అనంతరం వెంకటేశ్వర స్వామిని దర్శించుకొని.. స్వామి వారి పాదాల వద్ద జైశ్రీరామ్‌ పాటను సమర్పించారు.