Actress Who Acted In 450 Films : 14 ఏళ్లకే పెళ్లి.. 450 చిత్రాల్లో మెరిసిన ఆ నటి ఎవరో తెలుసా?

Actress Who Acted In 450 Films : చిత్రపరిశ్రమలోకి ఎందరో నటీనటులు వస్తుంటారు, పోతుంటారు. కానీ కొందరు మాత్రమే ఇక్కడ నిలదొక్కుకుంటారు. అలా ప్రేక్షకుల మనసుల్లో చిరస్థాయిలో స్థానం సంపాదించుకునే నటులు కూడా కొందరే ఉంటారు. అయితే కోలీవుడ్​కు చెందిన ఓ నటి అందరిలాగే ఇండస్ట్రీలోకి వచ్చారు. అయితే తన జీవితంలో ఎన్నో ఒడుదొడుకులు ఎదుర్కొని అనతికాలంలోనే సూపర్​ స్టార్​గా ఎదిగారు. ఆ తర్వాత అనూహ్య రీతిలో ఈ లోకాన్ని విడిచి వెళ్లారు. అయినప్పటికీ ఆమె గురించి ఇప్పటికీ మాట్లాడుకుంటారు ఆడియెన్స్​. ఇంతకీ ఆమె ఎవరంటే ?

Actress Who Acted In 450 Films : విజయలక్ష్మి.. ఈ పేరు ఎక్కడా విన్నట్లు లేదా? విజయలక్ష్మి అంటే తెలియకపోవచ్చు కానీ.. సిల్క్ స్మిత అంటే మాత్రం అందరూ టక్కున గుర్తుపట్టేస్తారు. దశాబ్దన్నర పాటు దక్షిణాది చిత్రపరిశ్రమను ఒక ఊపు ఊపిన తార ఆమె. ఒక తెలుగు సినిమాలో చెప్పినట్లు.. సిల్క్ స్మిత పేరులోనే వైబ్రేషన్స్ ఉన్నాయి. అలాంటి సిల్క్ జీవితంలో ఎన్నో ఒడుదొడుకులు.. ఎన్నో కష్టమైన రోజులు. అయినప్పటికీ ఆమె స్టార్ హీరోయిన్​గా ఎదిగిన తీరును ఎవ్వరూ మరిచిపోలేరు. ఆమె మనతో ఉన్నది కొంత కాలమే అయినా తన సినిమాలతో ప్రేక్షకులను ఇప్పటికీ అలరిస్తుంటారు.

1960, డిసెంబర్ 2న జన్మించిన సిల్క్.. తెలుగుతో పాటు తమిళంలో వందలాది విజయవంతమైన చిత్రాల్లో నటించారు. కన్నడ, మలయాళంతో పాటు హిందీలోనూ పలు సినిమాల్లో ఆమె కనిపించారు. సహాయ నటిగా కెరీర్​ను మొదలుపెట్టిన సిల్క్.. 1979లో విడుదలైన తమిళ చిత్రం 'వందిచక్కరం'తో మంచి గుర్తింపును తెచ్చుకున్నారు. 17 ఏళ్ల సుదీర్ఘ కెరీర్​లో అన్ని భాషల్లో కలిపి ఏకంగా 450 సినిమాలు చేశారు. చివరికి 1996, సెప్టెంబర్ 23న విషాదకర రీతిలో కన్నుమూశారు.

ఇంటి నుంచి పారిపోయి..
Silk Smitha Biography : కుటంబ ఆర్థిక పరిస్థితి సరిగ్గా లేకపోవడం వల్ల చిన్నతనంలోనే సిల్క్ స్మిత చదువు మానేయాల్సి వచ్చింది. ఆమెకు 14వ ఏటే వివాహం జరిగిందని అంటుంటారు. ఇందులో ఎంత నిజం ఉందనేది తెలియదు. అయితే పెళ్లి తర్వాత గృహహింసను కూడా ఎదుర్కొన్నారట సిల్క్. భర్తతో పాటు అత్తారింటి వేధింపులు తాళలేక ఆమె ఇంటి నుంచి పారిపోవాల్సి వచ్చిందని చెబుతుంటారు. భర్త ఇంటి నుంచి బయటికొచ్చిన సిల్క్.. మేకప్ ఆర్టిస్ట్ అయిన తన స్నేహితురాలి దగ్గరకు చేరారు.

సిల్క్ తన స్నేహితురాలి వెనక సినిమా చిత్రీకరణలకు వెళ్తూ అక్కడ మేకప్​లో మెళకువలు నేర్చుకున్నారు. కొన్ని నెలల తర్వాత ఆమె మేకప్ ఆర్టిస్టుగా పని చేయడం ప్రారంభించారు. అయితే ఆంథోని ఈస్ట్ మన్ అనే దర్శకుడు ఇచ్చిన ఆఫర్ సిల్క్ జీవితాన్ని మార్చేసింది. ఆ తర్వాత తమిళ దర్శకుడు వినూ చక్రవర్తితో కలసి పని చేయడం వల్ల ఆమె సినీ కెరీర్ ఒకేసారి భారీ మలుపు తిరిగింది.

టర్నింగ్ పాయింట్
Silk Smitha Movies : నటనతో పాటు డ్యాన్సుల్లో సిల్క్​కు ప్రత్యేక శిక్షణ ఇప్పించారు వినూ చక్రవర్తి. అలాగే ఆంగ్ల భాష నేర్చుకునే సౌకర్యాన్ని కూడా ఆమె కోసం ఏర్పాటు చేశారు. ఇక అక్కడి నుంచి సిల్క్ వెనుదిరిగి చూడాల్సిన అవసరం రాలేదు. దక్షిణాది భాషలన్నింటిలోనూ నటిస్తూ అనతి కాలంలోనే స్టార్ హోదా సంపాదించారు. మోహన్ లాల్, కమల్ హాసన్ లాంటి అగ్రతారల సరసన నటించి ప్రేక్షకుల అభిమానాన్ని చూరగొన్నారు.

సినిమాల పరంగా సక్సెస్, డబ్బు, క్రేజ్ చూసినప్పటికీ.. వ్యక్తిగత జీవితంలో మాత్రం సిల్క్ స్మితకు సంతోషం లేకుండా పోయింది. చిత్రపరిశ్రమలోకి వచ్చిన తర్వాత ఆమె ఒక వైద్యుడ్ని వివాహం చేసుకున్నారని చెబుతుంటారు. అప్పటిదాకా సిల్క్ స్మిత సంపాదించిన మొత్తం డబ్బుల్ని ఆమె భర్త సినిమాల్లో పెట్టుబడి పెట్టారని అంటుంటారు. అయితే ఆ చిత్రాలేవీ సరిగ్గా ఆడకపోవడం వల్ల ఆమె తీవ్రంగా నష్టపోయారట. కారణాలు తెలియదు గానీ 1996, సెప్టెంబర్ 23న ఆమె కానరాని లోకాలకు వెళ్లిపోయారు.

Silk Smitha Death Reason : సిల్క్ స్మిత మృతదేహం వద్ద పోలీసులు ఓ సూసైడ్ నోట్​ను కనుగొన్నారట. తన వ్యక్తిగత జీవితంతో ఆనందంగా లేనని.. అందుకే ప్రాణాలు విడిచేందుకు నిర్ణయించుకున్నట్లు అందులో సిల్క్ స్మిత్ రాశారని చెబుతుంటారు. అయితే ఇందులో ఎంత నిజం ఉందనేది మాత్రం స్పష్టంగా చెప్పలేని పరిస్థితి. ఏదేమైనా 14 ఏళ్లకే పెళ్లి చేసుకొని గృహహింసను ఎదుర్కొన్న ఒక బాలిక.. సినిమా పరిశ్రమలోకి అడుగుపెట్టడం, ఏకంగా 450 చిత్రాల్లో నటించి కోట్లాది మంది అభిమానాన్ని సంపాదించడం అంటే మాటలా? సిల్క్ స్మితను ఇష్టపడేవాళ్లు ఇప్పటికీ ఆమె ఇంకా కన్నుమూయలేదని.. తాను నటించిన సినిమాల్లో ఇంకా సజీవంగా ఉన్నారని అంటుంటారు.