ఇటీవలే చర్చనీయాంశంగా మారిన నటి వీణా కపూర్ హత్యకేసులో ఓ ట్విస్ట్ చోటు చేసుకుంది. చనిపోయింది అనుకున్న వీణాకపూర్ బతికి వచ్చింది. అంతేకాక తన కొడుకు చేతిలో హత్యకు గురైందన్న పుకార్లకు చెక్ పెడుతూ పోలీసులను ఆశ్రయించారు. వదంతులు సృష్టించినవారిపై చర్యలు తీసుకోవాలని ఫిర్యాదు చేశారు.
"ఇది ఒక మానసిక వేధింపు. నేను ఇప్పుడు ఫిర్యాదు చేయకపోతే, ఇది మళ్లీ ఇలాంటి ఘటనే వేరేవాళ్ల విషయంలో జరిగే అవకాశముంది" అని ఆమె అన్నారు. అయితే నిజానికి ఈ వ్యవహారంలో చనిపోయిన వ్యక్తి , నటి వీణా కపూర్.. పేరు, ప్రాంతం ఒకేలా ఉండటం వల్లే ఈ పొరపాటు జరిగిందని తెలిసింది.
ముంబయి జుహు ప్రాంతంలో పోలీసులకు ఓ మృతదేహం లభ్యమైంది. అయితే చనిపోయిన వృద్ధురాలు నటి వీణా కపూర్ అని, ఆమెను హత్య చేసింది తన కుమారుడు సచిన్ కపూర్ అని ప్రచారం సృష్టించారు. దీంతో పలువురు సినీ ప్రముఖులు నటి వీణా కపూర్కు నివాళులు అర్పించటమే కాక.. తన వీణా కపూర్ అసలు కుమారుడు అభిషేక్ను విమర్శించారు. ఇక ఈ కేసు వెలుగులోకి రాగానే నటి వీణా కపూర్ దిందోషి పోలీస్ స్టేషన్‌ను ఆశ్రయించారు. జరిగిన విషయాన్ని తెలుసుకున్నారు.
"నేను చనిపోయాననే పుకార్ల కారణంగా నా ఫొటో సోషల్ మీడియాలో వైరల్గా మారింది. చాలా మంది నాకు నివాళులర్పిస్తున్నారు. నా కొడుకును కూడా చాలా మంది అవమానిస్తున్నారు. ఇదంతా నిజమా?కాదా? అనే ఆలోచన లేకుండా ఇలా చేస్తున్నారు. నాకు ఈ విషయంపై చాలా మెసేజ్లు, ఫోన్ కాల్స్ వస్తున్నాయి. అయితే నేను ఇప్పుడు ఈ విషయంపై దృష్టి పెట్టి.. నా కొడుకు నన్ను చంపలేదని ప్రజలకు చెప్పాలనుకుంటున్నాను. నాపై తప్పుడు వార్తలు ప్రచారంలోకి వచ్చాయి. ఈ తప్పుడు పుకార్లు కారణంగా, నాకు వర్క్ ఆఫర్స్ కూడా రావటం లేదు. ఈ తప్పుడు వార్తలు నా పనిపై కూడా ప్రభావం చూపుతున్నాయి".
-నటి వీణా కపూర్
వీణా కపూర్తో పాటు ఆమె కుమారుడు అభిషేక్ చద్దా మీడియాతో మాట్లాడుతూ.. "నేను మా అమ్మను చంపేసినట్లు నాకు చాలా ఫోన్ కాల్స్ వచ్చాయి. నేను కలలో కూడా అలాంటి పని చేయను. నాకు మా అమ్మ అంటే చాలా ఇష్టం. సోషల్ మీడియాలో ఈ వార్త చదివి నేను అస్వస్థతకు గురయ్యాను. మా అమ్మ చనిపోలేదు. ఆస్తి కోసం నేను ఆమెను చంపలేదు. దయచేసి ఇలాంటి తప్పుడు ప్రచారాలు చేయొద్దని నేను నా చేతులు జోడించి అందరినీ వేడుకుంటున్నాను అని" ఆయన అన్నారు.
