Acharya Bhale Bhale Bhanjara Promo: మెగాస్టార్ చిరంజీవి, కొరటాల శివ కాంబోలో వస్తున్న 'ఆచార్య' చిత్రం నుంచి 'భలే భలే బంజారా' అనే గీతం ఏప్రిల్ 18న విడుదల కానుంది. ఇప్పటికే చిరంజీవి, రామ్ చరణ్ సంభాషణతో కూడిన టీజర్ వీడియో రిలీజ్ చేసిన చిత్రబృందం.. తాజాగా ఈ పాటకు సంబంధించిన గ్లింప్స్ వీడియో పంచుకుంది.
'సిరుత పులుల సిందాట' అంటూ సాగే 'భలే భలే బంజారా' గీతం ప్రోమో వీడియోను చిత్ర నిర్మాణ సంస్థ కొణిదెల ప్రొ కంపెనీ సోషల్ మీడియాలో షేర్ చేసింది. పూర్తి పాటను సోమవారం సాయంత్రం 4.05 గంటలకు విడుదల చేస్తామని వెల్లడించింది. 'భలే భలే బంజారా' గీతానికి మణిశర్మ బాణీలు అందించగా, రామజోగయ్యశాస్త్రి సాహిత్యం సమకూర్చారు. ప్రోమోలో చిరంజీవి, రామ్చరణ్ స్టెప్పులతో అదరగొట్టారు.
Ashoka Vanaamlo Arjuna Kalyanam: విశ్వక్సేన్ హీరోగా నటించిన రొమాంటిక్‌ ఎంటర్‌టైనర్‌ 'అశోకవనంలో అర్జున కల్యాణం'. ఏప్రిల్ 22న విడుదల కావాల్సిన ఈ చిత్రం పలు కారణాల వల్ల వాయిదా పడింది. మరో ముహూర్తంగా మే 6ను చిత్ర బృందం తాజాగా ఖరారు చేసింది. ఈ మేరకు ఓ పోస్టర్‌ను విడుదల చేసింది. ఇందులో విశ్వక్ పొలం గట్టుపై నడుస్తూ కనిపించాడు. విద్యాసాగర్‌ చింతా దర్శకత్వం వహించిన ఈ చిత్రంలో రుక్సర్‌ థిల్లాన్‌ కథానాయిక. బాపినీడు, సుధీర్‌ ఈదర నిర్మించిన ఈ సినిమాను బి.వి.ఎస్‌.ఎన్‌. ప్రసాద్‌ సమర్పిస్తున్నారు. పెళ్లి కోసం కలలు కనే మూడు పదుల వయసు దాటిన అర్జున్‌ కుమార్‌గా విశ్వక్సేన్ సందడి చేయబోతున్నట్టు ఇప్పటికే విడుదలైన టీజర్ చూస్తే అర్థమవుతోంది. మరి అర్జున్‌ పెళ్లి ఎలా జరిగింది? తెలియాలంటే సినిమా చూడాల్సిందే.