99 Cinema Ticket : ప్రస్తుతం నలుగురు సభ్యులున్న కుటుంబంతో కలిసి ఏదైనా సినిమాకు వెళ్లాలంటే కాస్త ఆలోచించాల్సిన పరిస్థితి ఏర్పడింది. థియేటర్‌లో టికెట్ ధరలతో పాటు, ఇతర ఖర్చులు.. సామాన్య ప్రజల జేబులను ఖాళీ చేస్తున్నాయి. దీంతో ఇప్పుుడు కుటుంబాలతో సినిమాలు చూసే వారి సంఖ్య కూడా గణనీయంగా తగ్గుతూ వస్తోంది. కానీ, ఈ శుక్రవారం మాత్రం సినీ ప్రియులకు ఓ బంపర్ ఆఫర్ లభించనుంది. అక్టోబర్ 13న జాతీయ సినిమా దినోత్సవం సందర్భంగా రూ.99కే సినిమా టికెట్‌ను పొందవచ్చు అంటూ ఓ ప్రకటన నెట్టింట తెగ ట్రెండ్ అవుతోంది. అయితే తెలుగు రాష్ట్రాలైన ఆంధ్రప్రదేశ్‌, తెలంగాణతో పాటు, తమిళనాడు, కేరళలలో మాత్రం ఈ ఆఫర్ వర్తించదు.
మరోవైపు తెలంగాణలోని మల్టీప్లెక్స్‌లలో మాత్రం రూ.112కే టికెట్ లభించనుంది. అలాగే, కేరళలోని పలు మల్టీప్లెక్స్‌లు రూ.129, మరికొన్ని చోట్ల రూ.99కే టికెట్లను విక్రయించనున్నారు. రెగ్యులర్‌ ఫార్మాట్‌, నాన్‌ రెక్లయినర్‌ సీట్స్‌కు మాత్రమే ఈ ఆఫర్ వర్తిస్తుందట. ఫుడ్, కూల్ డ్రింక్స్ ధరలపై కూడా డిస్కౌంట్ ఉండనున్నట్లు తెలుస్తోంది. అయితే బెంగళూరుతో పాటు దేశంలోని ఇతర నగరాల్లో మాత్రం రూ. 99 టికెట్ ఆఫర్ ఇప్పటికే అందుబాటులోకి వచ్చింది. అక్టోబర్ 13 తేదీన టికెట్ బుక్ చేసుకుంటే ధర రూ. 99 అనే చూపిస్తోంది.
National Cinema Day Offer : ఇక శుక్రవారం ఒక్క రోజే తెలుగులో పదికి పైగా చిన్న చిత్రాలు విడుదలకు సిద్ధంగా ఉన్నాయి. తెలంగాణలోని పలు మల్టీప్లెక్స్‌ల్లో రోజు ఉండే ధరతో పోలిస్తే, ఆ రోజు కాస్త తగ్గే అవకాశాలు కూడా కనిపిస్తున్నాయి. అయితే రూ. 99 టికెట్ ఆఫర్ ఐమ్యాక్స్, 4డీఎక్స్ వెర్షన్లకు వర్తించదని సమాచారం.