వివాదాల 'సాధ్వి' సంచలనాలు సృష్టిస్తారా?

హిందుత్వం.. భాజపా ప్రధాన ఎన్నికల అస్త్రం. 2 సీట్ల నుంచి దేశాన్ని ఏలే స్థాయికి తెచ్చింది ఆ హిందుత్వవాదమే. ఈ నినాదాన్ని ప్రజల్లోకి బలంగా తీసుకెళ్లేందుకు భాజపా ఎప్పటికప్పుడు ప్రయత్నిస్తూనే ఉంటుంది. ఇందులో భాగంగానే మాలెగావ్​ కేసులో నిందితురాలు సాధ్వి ప్రజ్ఞా సింగ్ ఠాకూర్​ను తెరపైకి తీసుకొచ్చింది కాషాయ పార్టీ. భోపాల్​లో కాంగ్రెస్​ సీనియర్​ నేత దిగ్విజయ్​సింగ్​పై పోటీకి దించింది. సాధ్వితో భాజపా చేస్తున్న ప్రయోగం ఏ మేరకు ఫలిస్తుందో చూడాలి!

ఎన్నికలు అంటేనే ప్రయోగాల సమాహారం. సమయం బట్టి, ప్రత్యర్థుల ఎత్తులకు అప్పటికప్పుడు వ్యూహాలు రచిస్తుంటాయి పార్టీలు. ఇందులో భాగంగా కొత్త వ్యక్తులూ హఠాత్తుగా ప్రత్యక్షం అవుతుంటారు. అలానే భాజపా ఓ వ్యక్తిని తెరపైకి తెచ్చి సంచలనం సృష్టించింది. వారే మాలెగావ్​ బాంబు పేలుళ్ల కేసు నిందితురాలిగా జైలు జీవితం గడిపిన సాధ్వి ప్రజ్ఞాసింగ్ ఠాకూర్.

సరైన సందర్భంలో తెరపైకి..

భోపాల్​.. భాజపా కంచుకోటల్లో ఒకటి. 8 పర్యాయాలుగా ఓటమన్నదే ఎరుగదు. ఈసారీ గెలుపుపై భాజపాకు అనుమానాలు లేవు. అయితే కాంగ్రెస్ అభ్యర్థిగా దిగ్విజయ్​ సింగ్​ పేరు ప్రకటనతో కొత్త వ్యూహాలవైపు భాజపా మొగ్గు చూపింది. హిందుత్వం, ఆర్​ఎస్​ఎస్​లను భాజపాకు ముడిపెట్టి విమర్శించటంలో డిగ్గీరాజాకు పెట్టింది పేరు. హిందూ, కాషాయ తీవ్రవాదమనే పదజాలంతో భాజపాను ఉటంకించేవారు.

హిందుత్వంపై ఐదేళ్ల కాలంలో తమపై వచ్చిన విమర్శలకు సమాధానంగా భాజపా ప్రయోగించిన అస్త్రమే సాధ్వి ప్రజ్ఞా సింగ్. భోపాల్​ స్థానంలో సాధ్విని బరిలో దించడం అంటే ఒకే వేదికగా రెండు ప్రయోజనాల కోసమే. కంట్లో నలుసులా మారిన దిగ్విజయ్​ ఓడించొచ్చు. రెండోది... సాధ్వి గెలుపుతో హిందుత్వంపై వస్తున్న విమర్శలను పటాపంచలు చేయొచ్చు. సాధ్వికి టికెట్​తో రాష్ట్రవ్యాప్తంగా హిందూ ఓటర్లు భాజపా వైపు మళ్లుతారని ఆ పార్టీ ఆశలు పెట్టుకుంది.

వివాదాలతోనే ఆరంభం

భాజపా వ్యూహాలకు తగ్గట్టే సాధ్వి ప్రజ్ఞా కూడా వ్యక్తిగతంగా దూకుడు పెంచారు. వివాదాస్పద వ్యాఖ్యలు, పదునైన పదాలతో ఎన్నికల సమరంలో వేడి పుట్టిస్తున్నారు. 2008 ముంబయి దాడుల్లో అమరులైన పోలీసు అధికారి హేమంత్​ కర్కరే.. తనను హింసించిన శాపం వల్లే ప్రాణాలు కోల్పోయారన్న వ్యాఖ్యలు పెద్ద దుమారమే రేపాయి. ఈసీ ఆగ్రహంతో ఆమె క్షమాపణలు చెప్పారు. అంతలోనే బాబ్రీ ఘటనలో పాల్గొన్నందుకు గర్విస్తున్నట్లు మరో బాంబు పేల్చారు. ఈసారి ఈసీ ఆదేశాలతో ఎఫ్​ఐఆర్​ నమోదైంది.

సాధ్వి చేస్తున్న వివాదాస్పద వ్యాఖ్యలన్నీ ముందస్తు ప్రణాళికల ప్రకారమే జరుగుతున్నాయని ప్రత్యర్థులు ఆరోపిస్తున్నారు. రెచ్చగొట్టే వ్యాఖ్యలతో దేశవ్యాప్తంగా చర్చకు తెరలేపి హిందూ వర్గం ఓట్లను కొల్లగొట్టే వ్యూహంలో భాగమని విమర్శిస్తున్నారు.

అయోధ్య తర్వాత సాధ్వి ప్రజ్ఞాసింగ్​ కేంద్రంగా మళ్లీ ఆ స్థాయిలో హిందుత్వ రాజకీయాల వైపు అడుగులు వేస్తోంది భాజపా. ఆమె గెలుపు ద్వారా తమపై విమర్శలకు చెక్​ పెట్టడం, హిందుత్వ నినాదానికి ప్రజామోదమే లక్ష్యంగా బహుముఖ వ్యూహాలతో వెళుతోంది. భాజపా వ్యూహాలను ప్రజలు ఎలా అర్థం చేసుకున్నారనేది తేలాలంటే మే 23 వరకూ ఆగాల్సిందే.