జగిత్యాల గ్రామీణ మండలం బావాజీపల్లెలో దారుణం చోటుచేసుకుంది. ఓ కుటుంబాన్ని కులం నుంచి బహిష్కరించినందుకు బాధితుడు పోలీసులకు ఫిర్యాదు చేశాడనే కక్షతో.. ఆ కుటుంబంపై గ్రామస్థులు దాడికి పాల్పడ్డారు. ఇంట్లో వస్తువులన్నీ ధ్వంసం చేసి. వారిపై విచక్షణ రహితంగా దాడికి తెగబడ్డరు. ఈ ఘటనలో పోలీసులు 15 మందిపై కేసు నమోదు చేసి దర్యాప్తు చేపట్టారు.
ఇదీ జరిగింది..
బావాజీపల్లెకు చెందిన గంగనీలయ్యకు, మరొకరికి భూమి విషయంలో వివాదం తలెత్తింది. గొడవ పరిష్కరించేందుకు వారం రోజుల కింద ఊరి పెద్దమనుషుల సమక్షంలో పంచయతీ ఏర్పాటు చేశారు. అయితే వారు చెప్పిన పరిష్కారం నచ్చకపోవడంతో నీలయ్య వారి మాటను ఒప్పుకోలేదు. పెద్ద మనుషులు ఇచ్చిన తీర్పు వినకపోవడంతో.. కోపగించిన కుల పెద్దలు నీలయ్య కుటుంబాన్ని కులం నుంచి బహిష్కరించారు.