డబ్బు ఇచ్చినట్టే ఇచ్చాడు.. అదనుచూసి కాజేశాడు

సొంత ఊళ్లో ఇల్లు కొనుగోలు చేద్దామనుకున్న ఓ వ్యక్తి తన స్నేహితుడి వద్ద డబ్బు అప్పు తీసుకున్నాడు. సాయం చేసినట్లే చేసి ఇచ్చిన డబ్బును కాజేశాడు ఆ ప్రబుద్ధుడు. చివరకు పోలీసులకు చిక్కి కటకటాలపాలైన ఘటన రాజన్న సిరిసిల్ల జిల్లా తంగళ్లపల్లిలో చోటుచేసుకుంది.

రాజన్న సిరిసిల్ల జిల్లా తంగళ్లపల్లి మండలం బస్వాపూర్ గ్రామానికి చెందిన రాగుల రమేశ్, పొన్నం శేఖర్, పుర్మాని ప్రశాంత్​లు ముగ్గురు స్నేహితులు. రమేశ్​ తన సొంత ఊళ్లో ఇల్లు కొనుగోలు చేయడానికి స్నేహితుడు.. శేఖర్​ను రూ.5 లక్షలు అప్పు అడిగాడు. ఏప్రిల్ 25న శేఖర్​ రమేశ్​కు డబ్బు ఇచ్చాడు. ఆ నగదును రమేశ్​.. సిరిసిల్ల అంబికా నగర్​లోని తన ఇంట్లో భద్రపరిచి బస్వాపూర్​ వెళ్లాడు.

అప్పు ఇచ్చినట్లుగా ఇచ్చి డబ్బు కాజేయాలనే ఉద్దేశంతో శేఖర్.. తన స్నేహితుడు ప్రశాంత్​తో కలిసి రమేశ్ ఇంట్లోని రూ.5లక్షలు దొంగతనం చేశారు. ఇద్దరు తమ వాటాలు పంచుకున్నారు. తన బీరువాలో పెట్టిన నగదు పోయిందని గ్రహించిన రమేశ్.. పోలీసులకు ఫిర్యాదు చేశాడు. కేసు నమోదు చేసుకున్న పోలీసులు దర్యాప్తు చేయగా.. శేఖర్, ప్రశాంత్​లే డబ్బు దోచినట్లు రుజువైంది. వారిని అరెస్టు చేసి రిమాండ్​కు తరలించినట్లు ఎస్పీ రాహుల్ హెగ్డే తెలిపారు.