బిహార్లోని దర్భంగా పేలుళ్ల(DARBHANGA BLAST) కేసు విచారణలో ఎన్ఐఏ వేగం పెంచింది. హైదరాబాద్లో ఇద్దరిని అరెస్ట్ చేయగా తాజాగా ఉత్తరప్రదేశ్లో మరో ఇద్దరు లష్కరే తోయిబా తీవ్రవాదులను అదుపులోకి తీసుకుంది. ఉత్తరప్రదేశ్లోని ఖైరానాకు చెందిన హాజి సలీం, కాఫీల్ను ఎన్ఐఏ అధికారులు అరెస్టు చేశారు. పీటీ వారెంట్పై ఇద్దరు నిందితులను పాట్నా తీసుకెళ్లారు. దర్భంగా పేలుళ్ల కేసులో ఇద్దరు నిందితులు కీలకంగా వ్యవహరించినట్లు ఎన్ఐఏ అధికారుల దర్యాప్తులో తేలింది.
ఫిబ్రవరిలో కుట్ర
ఫిబ్రవరి నెలలో హజి సలీం ఇంట్లో పేలుళ్లకు సంబంధించి కుట్రపన్నారు. రైల్లో పేలుడు జరపడం ద్వారా ప్రాణ, ఆస్తి నష్టం సంభవించేలా చేయాలని నిందితుల కుట్రపన్నారు. పాకిస్థాన్లో తలదాచుకుంటున్న లష్కరే తోయిబా తీవ్రవాది ఇక్బాల్ ఖానా ఆదేశాల మేరకు పేలుళ్లకు కుట్ర పన్నారు. ఇక్బాల్ ఖానా పంపించిన నిధులను హజీ సలీం పేలుళ్లకు ఉపయోగించారు. ఈ కేసులో హైదరాబాద్కు చెందిన ఉగ్రవాద సోదరులను ఎన్ఐఏ అరెస్టు చేసింది. నాంపల్లికి చెందిన ఇమ్రాన్ ఖాన్, నసీర్ ఖాన్ అరెస్టు చేసి పీటీ వారెంట్పై పాట్నాకు తీసుకెళ్లింది.
జూన్ 17న పార్సిల్ బాంబు పేలుడు
దర్భంగా రైల్వే స్టేషన్లో జూన్ 17న పార్సిల్ బాంబు పేలుడు జరిగింది. సికింద్రాబాద్ నుంచి పార్సిల్ వెళ్లినట్లు అధికారులు గుర్తించి విచారణ ప్రారంభించారు. మహ్మద్ నసీర్ ఖాన్ 2012లో పాకిస్థాన్ వెళ్లి ఎల్ఈటీలో శిక్షణ పొందాడని ఎన్ఐఏ తెలిపింది. రసాయనాలతో ఐఈడీ తయారు చేయడంలో నసీర్ శిక్షణ పొందాడని, సోదరుడు ఇమ్రాన్‌తో కలిసి ఐఈడీ తయారు చేశాడని వెల్లడించింది. వస్త్రాల్లో ఐఈడీ పెట్టి సికింద్రాబాద్-దర్భంగా రైల్లో పార్సిల్ పంపారని ఎన్ఐఏ దర్యాప్తులో తేలింది. నసీర్, ఇమ్రాన్ పాక్‌లో లష్కరేతొయిబా ఉగ్రవాదులతో టచ్‌లో ఉన్నారని తెలిపింది. ఈ నెల 15న సికింద్రాబాద్ రైల్వే స్టేషన్లో పార్శిల్ను దర్భంగాకు సుఫియాన్ అనే వ్యక్తి పేరుతో నకిలీ పాన్కార్డు చూపించి పంపించారు. దర్భంగాలో పార్శిల్ తీసుకునే వ్యక్తి పేరు కూడా సూఫియాన్ అనే రాసి ఉంచారు. ఫోన్ నంబర్ కూడా నకిలీదే ఇచ్చారు.
ఇరవై ఏళ్ల క్రితం హైదరాబాద్కు...
ఉత్తర్ప్రదేశ్లోని ఖైరానాకు చెందిన నసీర్ రెండు దశాబ్దాల క్రితం హైదరాబాద్కు వచ్చి ఆసిఫ్నగర్లో స్థిరపడ్డాడు. వస్త్ర వ్యాపారం చేస్తూ హైదరాబాద్కు చెందిన యువతినే పెళ్లి చేసుకున్నట్లు అధికారుల దర్యాప్తులో తేలింది. ఏడాది క్రితం నసీర్ సోదరుడు ఇమ్రాన్ కూడా హైదరాబాద్కు వచ్చి ఆసిఫ్నగర్లోనే మరో గది అద్దెకు తీసుకొని నివాసం ఉంటున్నాడు. అయితే వీళ్లిద్దరూ.. ఓ ఉగ్రవాది ఆదేశాలు పాటిస్తున్నట్లు అధికారులు భావిస్తున్నారు.
ఇదీ చదవండి:'అనుమతులు లేకుండా రాయలసీమ ఎత్తిపోతలను ఎలా నిర్మిస్తున్నారు'
