Telangana Realtors Murder Case: రంగారెడ్డి జిల్లా ఇబ్రహీంపట్నం సమీపంలోని కర్ణంగూడ కాల్పుల ఘటనలో పోలీసుల దర్యాప్తు కష్టతరంగా మారింది. మంగళవారం ఉదయం ఇద్దరు స్థిరాస్తి వ్యాపారులపై గుర్తు తెలియని దుండగులు కాల్పులు జరిపారు. ఘటనాస్థలంలోనే స్థిరాస్తి వ్యాపారి శ్రీనివాస్ రెడ్డి చనిపోగా.... చికిత్స పొందుతూ రాఘవేందర్ రెడ్డి మృతిచెందారు. తమపై కాల్పులు జరిపింది ఎవరో తెలియదని చెప్పిన రాఘవేందర్ రెడ్డి.. అంతలోనే పరిస్థితి విషమించటంతో ప్రాణాలు విడిచారు. కాల్పుల గురించి తెలుసుకునే లోపే ఆయన చనిపోవటంతో కేసు విచారణ పోలీసులకు సవాల్గా మారింది. దీంతో సాంకేతిక ఆధారాలపైనే దృష్టి సారించిన పోలీసులు... మృతుల కాల్డేటా, సెల్ఫోన్ సిగ్నళ్ల ఆధారంగా విచారణ సాగిస్తున్నారు.
వివాదాస్పద భూముల సెటిల్మెంట్లోను చేయి
శ్రీనివాస్ రెడ్డి డ్రైవర్ కృష్ణ, హఫీజ్ల పేరు మీద పలు ఆస్తులను.. ఆయన రిజిస్ట్రేషన్ చేసినట్లు పోలీసులు గుర్తించారు. వీరిద్దరూ శ్రీనివాస్ రెడ్డికి బినామీలుగా వ్యవహరిస్తున్నట్లు తేల్చారు. కృష్ణ, హఫీజ్లతో పాటు పక్క పొలానికి చెందిన మట్టారెడ్డి, ఇతర అనుమానితులను అదుపులోకి తీసుకుని విచారిస్తున్నారు. కాగా... కాల్పులకు శ్రీనివాస్ రెడ్డి వివాదాస్పద భూమి కారణం కాదని భావిస్తున్నారు. పలు వివాదాస్పద భూములను ఇప్పటికే ఆయన సెటిల్మెంట్ చేసినట్లు పోలీసులు గుర్తించారు. గత కొన్ని నెలలుగా ఆయన జోక్యం చేసుకున్న భూవ్యవహారాల గురించి ఆరాతీస్తున్నారు.