Husband killed wife in moosapet: పెళ్లైన 6 నెలలకే భార్యపై అనుమానం.. ఆపై గొంతు నులిమి హత్య.!

Husband killed wife in moosapet: కొత్త కాపురం.. కోటి ఆశలతో అత్తారింట అడుగుపెట్టిన నవ వధువుకు.. భర్త ప్రేమానురాగాలకు బదులుగా అనుమానాలు స్వాగతం పలికాయి. పెళ్లికి ముందు ఎంతో ప్రేమ చూపించిన వ్యక్తి.. ఇప్పుడిలా మాట్లాడుతున్నాడేంటని అనిపించినా.. మారతాడులే అని సర్దుకుపోయింది. కానీ రోజురోజుకీ అతని ఆగడాలు మితిమీరిపోయాయి. ఎంతగా అంటే లేనిపోని అనుమానాలతో కన్న తల్లిదండ్రులతోనూ ఆమెను మాట్లాడనివ్వలేదు. అయినా ఓర్చుకుంది. కానీ చివరికి తన భర్త చేతిలోనే శవమై మిగిలింది. పెళ్లైన ఆరు నెలలకే విగతజీవిగా మారింది.

Husband killed wife in moosapet: అనుమానం పెనుభూతంగా మారి ఓ నిండు ప్రాణాన్ని బలితీసుకుంది. పెళ్లైన ఆరు నెలలకే భార్యపై అనుమానం పెంచుకున్న భర్త.. చివరికి ఆమె ఉసురు తీసుకునే వరకూ నిద్రపోలేదు. చీటికిమాటికీ అవమానాలతో మానసికంగా, శారీరకంగా వేధించడం మొదలుపెట్టాడు. మద్యానికి బానిసై ప్రతి నిత్యం ఆమెతో గొడవలకు దిగేవాడు. అనురాగాలు, ఆప్యాయతలు ఉండాల్సిన వారి కొత్త కాపురంలో అనుమానం చిచ్చు రేపింది. చివరికి కట్టుకున్న భార్యను చంపి.. పోలీసులకు దొరకకూడదని పరారయ్యాడు. హైదరాబాద్​ కూకట్​పల్లి పోలీసు స్టేషన్​ పరిధిలో ఈ ఘటన చోటుచేసుకుంది. హత్యకు గల కారణాలను కూకట్​పల్లి పోలీసులు మీడియాకు వెల్లడించారు.

వేరు కాపురం పెట్టి

Husband killed wife: ఏపీలోని శ్రీకాకుళం జిల్లాకు చెందిన సంతోష్.. బాల్యంలోనే తన తల్లిదండ్రులతో సహా ముసాపేటలో స్థిరపడ్డాడు. వెల్డింగ్ షాపులో వర్కర్​గా పనిచేస్తున్న సంతోష్.. స్థానికంగా నివాసం ఉంటున్న పుణ్యావతిని(20).. 2021 మే లో వివాహం చేసుకున్నాడు. ఆ తర్వాత ఇద్దరూ కలిసి మూసాపేటలోనే వేరు కాపురం పెట్టారు. అనంతరం పెళ్లైన కొద్ది రోజులకే సంతోష్​.. భార్యపై అనుమానం పెంచుకున్నాడు. ఆ అనుమానంతో ఆమె తన కుటుంబ సభ్యులతో సహా ఎవరితో మాట్లాడకూడదంటూ షరతులు విధించాడు. మానసికంగా వేధింపులకు పాల్పడేవాడు. భర్త వేధింపులకు విసిగిన పుణ్యావతి.. అమ్మానాన్న, అత్తామామలకు ఫిర్యాదు చేసింది. ఇరు కుటుంబాలు జోక్యం చేసుకుని.. గొడవలు మాని, సఖ్యతతో ఉండాలని సంతోష్​కు సూచించారు. పుణ్యావతి తల్లిదండ్రులు ఆమెతో మాట్లాడకూడదని.. అలా అయితే మంచిగా ఉంటానని చెప్పడంతో వాళ్లు దానికి ఒప్పుకున్నారు. ఆ తర్వాత కొన్ని రోజులు బాగానే ఉన్న సంతోష్​.. మళ్లీ మొదటికి వచ్చాడు. ప్రవర్తన మార్చుకోకుండా మద్యం సేవించి నిత్యం భార్యతో గొడవపడేవాడు.

గొంతు నులిమి

ఈ క్రమంలో గురువారం సాయంత్రం నుంచి సంతోష్ ఇంటికి తాళం వేసి ఉండటంతో అనుమానం వచ్చిన ఇరుగుపొరుగు.. వారి కుటుంబ సభ్యులకు సమాచారం అందించారు. ఉదయం ఇంటికి చేరుకున్న ఇరు కుటుంబీకులు.. తలుపులు తెరిచి చూడగా పుణ్యావతి విగతజీవిగా కనిపించింది. కూకట్​పల్లి పోలీసులకు సమాచారం అందడంతో ఘటనా స్థలానికి చేరుకుని పరిశీలించారు. పుణ్యావతి గొంతు నులిమి.. సంతోష్ హత్యకు పాల్పడి పరారై ఉంటాడని పోలీసులు అనుమానిస్తున్నారు. మృత దేహాన్ని పోస్టుమార్టం నిమిత్తం ఆస్పత్రికి తరలించారు. మృతురాలి తల్లిదండ్రుల ఫిర్యాదు మేరకు కేసునమోదు చేసుకున్న పోలీసులు దర్యాప్తు చేస్తున్నారు. పరారీలో ఉన్న నిందితుడి కోసం గాలిస్తున్నారు.

ఇదీ చదవండి:husband killed wife: భార్యను కిరాతకంగా హతమార్చిన భర్త.. ఆపై తలతో....