విద్యుత్ బకాయిలు చెల్లించని వారిని గుర్తించి కొందరు మోసాలకు పాల్పడుతున్నారు. విద్యుత్ బిల్లుల బకాయిలు ఉండటం వల్ల ఈ రోజు రాత్రి 10.30 తరవాత విద్యుత్ సరఫరా నిలిపివేస్తామని సందేశాలు పంపిస్తున్నారు. అలా విద్యుత్ సరఫరా నిలిపివేయకుండా ఉండేందుకు, బిల్లుల చెల్లింపు కోసం విద్యుత్ అధికారి (9692848762)కి కాల్ చేయండి అంటూ వినియోగదారులకు మోసపూరిత మెసేజ్లు పంపిస్తున్నారు.
ఈ విషయం ఎస్పీడీసీఎల్ దృష్టికి వచ్చింది. దీంతో ఎస్పీడీసీఎల్ సీఎండీ... వినియోగదారులను అప్రమత్తం చేశారు. గతంలో కూడా విద్యుత్ వాడకం బిల్లుల చెల్లింపు పేరుతో కొంత మంది వ్యక్తులు వినియోగదారులను మెసేజ్ల ద్వారా, ఫోన్ల ద్వారా సంప్రదించి విద్యుత్ బిల్లులు పెండింగ్లో ఉన్నాయనే సందేశాలు వచ్చేవని వెల్లడించారు. అలా వినియోగదారులను బెదిరించి వారి బ్యాంకు అకౌంట్, డెబిట్ కార్డు వివరాలు తీసుకుని వారి అకౌంట్ల నుంచి నగదును విత్ డ్రా చేసుకుని మోసం చేసిన ఘటనలు కూడా తమ దృష్టికి వచ్చాయని ఎస్పీడీసీఎల్ సీఎండీ రఘుమారెడ్డి తెలిపారు.
విద్యుత్ వినియోగదారులు ఇలాంటి మోసపూరిత సందేశాలు, కాల్స్ పట్ల అప్రమత్తంగా ఉండాలని విజ్ఞప్తిచేశారు. ఒక వేళ ఎవరైనా వ్యక్తులు తమకు ఫోన్ చేసినా, మెసేజ్ ద్వారా గాని విద్యుత్ బిల్లు పెండింగ్లో ఉందని పేర్కొంటే... సంస్థ వెబ్ సైట్ www.tssouthernpower.com, TSSPDCL మొబైల్ యాప్లో సరి చూసుకోవాలని సూచించారు. రాత్రిపూట, అర్ధరాత్రి పూట విద్యుత్ సరఫరా నిలిపివేయడం వంటి చర్యలను విద్యుత్ సంస్థ చేయదని సీఎండీ పేర్కొన్నారు. అలాంటి మెసేజ్లు కానీ, ఫోన్లు కానీ వస్తే.. వెంటనే పోలీస్ శాఖ వారికి ఫిర్యాదు చేయాలని సూచించారు.