ఆరుగురు మావోయిస్టు మిలీషియా సభ్యులు అరెస్ట్​

భద్రాద్రి కొత్తగూడెం జిల్లా అటవీ ప్రాంతంలో ఆరుగురు మావోయిస్టు మిలీషియా సభ్యులు పోలీసులకు పట్టుబడ్డారు. వీరు అనేక ప్రభుత్వ వ్యతిరేక కార్యకలాపాల్లో పాల్గొన్నట్లు భద్రాచలం ఏఎస్పీ పేర్కొన్నారు. వారిని రిమాండ్​కు తరలించారు.

భద్రాద్రి కొత్తగూడెం జిల్లా చర్ల మండలం పూసగుప్ప వద్ద ఆరుగురు మావోయిస్టు మిలీషియా సభ్యులను పోలీసులు అరెస్టు చేసారు. ఆరుగురిలో ఒక బాలుడు(17) ఉన్నట్లు గుర్తించారు. రాష్ట్ర సరిహద్దు ప్రాంతమైన పూసగుప్ప వద్ద.. పోలీసులు, సీఆర్​పీఎఫ్ సిబ్బంది కూంబింగ్ నిర్వహిస్తున్నారు. ఆ సమయంలో పోలీసులను చూసి పారిపోతున్న ఆరుగురు మిలీషియా సభ్యులను అరెస్టు చేసినట్లు భద్రాచలం ఏఎస్పీ జీ.వినీత్ తెలిపారు.

ఈ ఆరుగురు ఛత్తీస్​గఢ్​కు చెందిన వారని.. రెండుమూడేళ్లుగా మావోయిస్టు మిలీషియా సభ్యులుగా పనిచేస్తున్నారని ఏఎస్పీ పేర్కొన్నారు. వీరు పోలీసులను హతమార్చేందుకు ప్రయత్నాలే గాక, ప్రభుత్వ వ్యతిరేక కార్యకలాపాల్లోనూ పాల్గొన్నట్లు వెల్లడించారు. ఐదుగురిని రిమాండ్​కు తరలించగా.. మైనర్ బాలుడిని జువైనల్ హోంకి తరలించినట్లు వివరించారు.

ఇదీ చదవండి:TEMPLE LANDS: కబ్జా కోరల్లో దేవుని మాన్యం.. ఆక్రమణలే కానీ రక్షణ శూన్యం.!