సంగారెడ్డి హత్య కేసును ఛేదించిన పోలీసులు

సంగారెడ్డి జిల్లా కొత్లాపూర్​లో ఈనెల 5న హత్యకు గురైన రవీందర్ గౌడ్​ కేసును పోలీసులు ఛేదించారు. వివాహేతర సంబంధమే హత్యకు కారణమని దర్యాప్తులో వెల్లడైనట్లు తెలిపారు.

సంగారెడ్డి జిల్లా కొత్లాపూర్​ గ్రామానికి చెందిన రవీందర్ గౌడ్ హత్య కేసును పోలీసులు ఛేదించారు. ఈనెల 5న జిల్లాకేంద్రంలోని తార ప్రభుత్వ డిగ్రీ కళాశాలలో గుర్తుతెలియని దుండగులు రవీందర్ గౌడ్​పై దాడి చేశారు. కొన ఊపిరితో ఉన్న రవీందర్​ను.. మరుసటి రోజు ఉదయం నడకకు వచ్చిన స్థానికులు గుర్తించారు. పోలీసులకు సమాచారం అందించి.. అతణ్ని ఆస్పత్రిలో చేర్పించారు.

ఉస్మానియా ఆస్పత్రిలో.. చికిత్స పొందుతూ రవీందర్​ గౌడ్ మంగళవారం రోజున మృతి చెందాడు. అతని భార్య ఫిర్యాదు మేరకు కేసు నమోదు చేసుకున్న పోలీసులు దర్యాప్తు చేశారు. సీసీకెమెరాల సాయంతో నిందితుణ్ని అదుపులోకి తీసుకున్నారు. తన భార్యతో వివాహేతర సంబంధం పెట్టుకున్నాడనే కారణంతోనే రవీందర్​ను హత్య చేసినట్లు నిందితుడు దర్యాప్తులో అంగీకరించినట్లు పోలీసులు తెలిపారు. హత్యకు సహకరించిన మరో వ్యక్తిని, ఆటో, కారు, మొబైల్ ఫోన్లను సీజ్ చేసినట్లు వెల్లడించారు.

• ఇదీ చూడండి :చోరీ కేసులో జైలుకెళ్లింది.. తిరిగొచ్చి పెళ్లాడమంది..