అప్పు తిరిగి చెల్లించమన్నందుకే.. చంపేశారు: డీఎస్పీ

సంగారెడ్డి జిల్లా గుమ్మడిదలలో మహిళ హత్య కేసును పోలీసులు ఛేదించారు. అప్పుగా ఇచ్చిన రూ.10 వేలు తిరిగివ్వమని అడిగినందుకు ఆ మహిళతో పాటే ఉంటున్న గణేశ్​ అనే వ్యక్తి ఆమెను హతమార్చినట్లు తెలిపారు. నిందితుడితో పాటు కేసుతో సంబంధం ఉన్న మరో మహిళను అరెస్టు చేసి రిమాండ్​కు తరలించినట్లు వెల్లడించారు.

సంగారెడ్డి జిల్లా గుమ్మడిదలలో నివాసముంటున్న భాషమ్మకు తన పక్క గదిలోనే ఉండే గణేశ్​కు కొంతకాలంగా పరిచయం ఉండడంతో... ఇద్దరు కలిసి ఉంటున్నారు. గణేశ్​కు డబ్బులు అవసరం అవ్వడంతో భాషమ్మ తన బంగారం అమ్మి రూ.10 వేలు అప్పుగా ఇచ్చింది. ఆ నగదు ఇవ్వమని బాషమ్మ ఎన్నిసార్లు అడిగినా ఇస్తానని చెప్పేవాడు కానీ ఇవ్వలేదు.

బ్లేడ్​లతో గొంతు కోసి...

అయితే గణేశ్​కు ముందే నర్సాపూర్​కు చెందిన స్వప్న అనే మహిళతో పరిచయం ఉంది. భాషమ్మ తరచూ అప్పు తీర్చమని గణేశ్​ను అడగడంతో ఆమెను వదిలించుకోవాలని స్వప్న ఆయన్ను ప్రేరేపించింది. దీంతో ఈనెల 14న రాత్రి నిందితుడు భాషమ్మ ఇంటికి వెళ్లి పదునైన రెండు బ్లేడ్​లతో ఆమె గొంతు కోసి హత్య చేశాడు. అనంతరం అక్కడి నుంచి పరారయ్యాడు.

ఇద్దరు నిందితులు అరెస్టు...

ఈనెల 17న బొంతపల్లి కమాన్ వద్ద ద్విచక్ర వాహనంపై వెళుతుండగా గణేశ్​ను గుమ్మడిదల పోలీసులు అదుపులోకి తీసుకున్నారు. విచారించగా నిందితుడు తన నేరాన్ని ఒప్పుకున్నట్లు పటాన్ చెరు డీఎస్పీ భీమ్ రెడ్డి తెలిపారు. హత్యకు ప్రేరేపించిన స్వప్నను కూడా అరెస్టు చేసి ఇద్దరు నిందితులను రిమాండ్​కు తరలించినట్లు వెల్లడించారు. వారి వద్ద నుంచి చరవాణిలతో పాటు ద్విచక్ర వాహనాన్ని స్వాధీనం చేసుకున్నట్లు పేర్కొన్నారు.

ఇదీ చదవండి: పోలీసులపై ఆరోపణలు సరికాదు: సీపీ