సామాజిక మాధ్యమాల ఆధారంగా పదుల సంఖ్యలో మహిళలను మోసగించి నేరాలకు పాల్పడిన ఏపీలోని కడప జిల్లాకు చెందిన ఘరానా మోసగాడు ప్రసన్నకుమార్‌పై పీడీ యాక్టు(pd act) ప్రయోగించారు. ఈ విషయాన్ని జిల్లా పోలీసు అధికారి అన్నురాజన్‌ వెల్లడించారు. ప్రొద్దుటూరు పట్టణం గీతాశ్రమం వీధికి చెందిన చెన్నుపల్లి ప్రసన్నకుమార్‌ అలియాస్‌ రాజారెడ్డి అలియాస్‌ టోనీ కడప విజయవాడ, హైదరాబాద్ నగరాల్లో షేర్‌చాట్‌, ఫేస్బుక్, ఇన్‌స్టాగ్రామ్‌ తదితర సామాజిక మాధ్యమాల ద్వారా మహిళలను, లక్ష్యంగా ఎంచుకుని వారితో పరిచయం పెంచుకునేవాడు.
ప్రేమ పేరిట మాయమాటలు చెప్పి వారితో అసభ్యకర రీతిలో చాటింగ్‌ చేసేవాడు. వారికి తెలియకుండా వారు నగ్నంగా ఉన్న చిత్రాలు, వీడియోలను రికార్డు చేసి వారిని బ్లాక్‌మెయిల్‌ చేస్తూ వారి నుంచి డబ్బులు వసూలు చేసేవాడు. మరి కొంతమందిని శారీరకంగా కూడా అనుభవించడంతోపాటు వారి నుంచి డబ్బులు, బంగారు ఆభరణాలు కూడా తీసుకెళ్లి వాటిని అమ్మి జల్సాలు చేసేవాడు. ఈ విధంగా పదుల సంఖ్యలో మహిళలను మోసగించాడు. బయటకు తెలిస్తే తమ పరువు పోతుందని చాలామంది బాధితులు ఫిర్యాదు చేసేందుకు ముందుకు రాలేదు. ఇంతే కాకుండా.. చాపాడు, ప్రొద్దుటూరు పరిధిలోని ఠాణాల పరిధిలో ఇతనిపై దొంగతనాల కేసులు కూడా ఉన్నాయి. 2019లో ప్రొద్దుటూరు ఒకటో పట్టణ ఠాణా పరిధిలో క్రికెట్‌ బెట్టింగ్‌ కేసులో, 2020 నవంబరులో తెలంగాణ రాష్ట్రంలోని శంషాబాద్‌ పరిధి చౌదరిగూడెం రాఠా పరిధిలో ఒక వివాహితను లైంగికంగా వేధించి డబ్బుల కోసం బెదిరించాడు.
2020 విజయవాడ కమిషనరేట్‌ పరిధిలోని పెనమలూరు ఠాణా పరిధిలో కూడా ఓ వివాహితను లైంగికంగా వేధించాడు. జిల్లాలో కడప, ఎర్రగుంట్ల, వల్లూరు ప్రాంతాల్లో పలు నివాసాల్లో చోరీలకు పాల్పడ్డాడు. కడప, ప్రొద్దుటూరు పరిధిలో ద్విచక్రవాహనాల చోరీ కేసుల్లో కూడా నిందితుడిగా ఉన్నాడు.