ఆంధ్రప్రదేశ్‌లోని తిరుపతిలో 5 నెలల క్రితం జరిగిన ఘోరం ఆలస్యంగా బయటపడింది. తనతో విభేదించి పుట్టింటికి వెళ్లిన భార్యను కాపురానికి తీసుకెళ్తున్నట్లు నమ్మించిన భర్త.. అత్యంత దారుణంగా హత్య చేశాడు. ఆ తర్వాత భార్య మృతదేహాన్ని చెరువులో పడేసి కనిపించకుండా పోయాడు. అనుమానంతో అత్తింటివారు పోలీసులకు ఫిర్యాదు చేయడంతో ఇన్నేళ్ల తర్వాత ఈ దురాగతం వెలుగులోకి వచ్చింది.
వీడిన మిస్టరీ:తిరుపతి సత్యనారాయణపురానికి చెందిన పద్మ అదృశ్యం కేసు మిస్టరీ వీడింది. ఈ కేసును పోలీసులు ఛేదించారు. పద్మను ఆమె భర్తే కిరాతంగా హత్య చేసినట్లు నిర్ధరించారు. జనవరి ఐదో తేదీనే భార్యను చంపేసిన వేణుగోపాల్... మృతదేహాన్ని సూట్‌కేసులో పెట్టి చెరువులో పడేశాడు. అప్పటినుంచి పద్మ తనతోపాటే ఉందంటూ అత్తగారి కుటుంబాన్ని నమ్మించాడు. నెలలు గడుస్తున్నా పద్మ నుంచి ఎలాంటి సమాచారం లేకపోవడం, వేణుగోపాల్ తీరు అనుమానాస్పదంగా ఉండటంతో... పద్మ కుటుంబసభ్యులు తిరుపతి ఈస్ట్ పోలీస్‌స్టేషన్‌లో ఫిర్యాదు చేశారు. ఈమేరకు వేణుగోపాల్‌ను అదుపులోకి తీసుకుని విచారణ చేసిన పోలీసులు... నిందితుడు ఇచ్చిన సమాచారం ఆధారంగా తిరుపతి శివారు వెంకటాపురం చెరువులో గాలించారు. అక్కడ సూట్‌కేసు స్వాధీనం చేసుకుని... కుళ్లిన స్థితిలో ఉన్న పద్మ మృతదేహాన్ని గుర్తించారు.