వీడిన మిస్టరీ: కరీంనగర్​ కోర్టు ఎదుట హత్య కేసులో మాజీ భర్తే హంతకుడు

పెళ్లైన వ్యక్తిని ప్రేమ వివాహం చేసుకుంది. బంధువులు అంగీకరించకపోవడంతో పెద్దల సమక్షంలో విడాకులు తీసుకుంది. మరో వ్యక్తిని పెళ్లాడి, సంసార జీవితంలోకి అడుగుపెట్టింది. వీరి దాంపత్య జీవితానికి గుర్తుగా ముగ్గురు పిల్లలూ పుట్టారు. కట్​చేస్తే.. మొదట ప్రేమ పెళ్లి చేసుకున్న భర్తతో హైదరాబాద్​లో కాపురం పెట్టింది. అక్కడే మరో యువకుడితో వివాహేతర సంబంధం పెట్టుకుంది. చివరికి మురికి కాలువలో శవమై తేలింది. ఈ మిస్టరీ కేసును ఎట్టకేలకు పోలీసులు ఛేదించారు.

కరీంనగర్​లో ఈ నెల 23న జరిగిన గుర్తుతెలియని మహిళ హత్య కేసును పోలీసులు ఛేదించారు. కట్టుకున్నవాడే మహిళను హత్య చేసినట్లు తెలిపారు. మృతురాలు దాసరి కవితగా గుర్తించారు. సీసీ కెమెరాల సాయంతో నిందితుడు ఆసాది కమలాకర్​ను అదుపులోకి తీసుకున్నారు. ఈ మేరకు కరీంనగర్ సీపీ కమలాసన్​రెడ్డి కేసు వివరాలను వెల్లడించారు.

మంచిర్యాల జిల్లా లక్షెట్టిపేట మండలం ఉత్పూరు గ్రామానికి చెందిన ఆసాది కమలాకర్​ తన మొదటి భార్యను వదిలేసి, దాసరి కవితను ప్రేమ వివాహం చేసుకున్నాడు. వీరిద్దరి మధ్య 10 సంవత్సరాల తేడా ఉండటంతో కవిత బంధువులు ఈ పెళ్లిని అంగీకరించలేదు. ఫలితంగా మూడు నెలలకే పెద్దల సమక్షంలో విడాకులు తీసుకున్నారు.

అప్పటి నుంచి కమలాకర్ ఊరిని వదిలి, హైదరాబాద్​లో ఉంటున్నాడు. కవిత మరో వివాహం చేసుకుంది. ఆమెకు ఇద్దరు కుమారులు, ఒక కూతురు ఉంది. వీరి సంసారం సాఫీగా సాగుతుండగా.. కమలాకర్​ మళ్లీ కవితతో మాట్లాడటం మొదలుపెట్టాడు. తన వద్దకు వస్తే బాగా చూసుకుంటానని నమ్మబలికి, హైదరాబాద్​కు రప్పించుకున్నాడు. ఇద్దరూ కలిసి ఉంటున్నారు.

మరో యువకుడితో వివాహేతర సంబంధం..

ఇంతలో నగరంలో మరో యువకుడితో కవితకు వివాహేతర సంబంధం ఏర్పడింది. ఈ విషయం కమలాకర్​కు తెలిసింది. ఫలితంగా ఇద్దరి మధ్య మనస్పర్ధలు ఏర్పడ్డాయి. ఈ క్రమంలోనే కమలాకర్ కవితను లక్షెట్టిపేటలో దింపేందుకు హైదరాబాద్ నుంచి కారులో బయల్దేరారు. కరీంనగర్​లోని కోర్టు సమీపంలో ఉన్న బస్టాండ్​లో దింపాడు.

అతనితోనే ఉంటా..

కానీ కవిత తాను తిరిగి హైదరాబాద్​ వెళ్తానని.. నగరంలోని యువకుడితోనే ఉంటానని చెప్పింది. దీంతో కోపోద్రిక్తుడైన కమలాకర్​ కవిత మెడలో ఉన్న చున్నీతో ఉరి వేసి చంపేశాడు. అనంతరం పక్కనే ఉన్న మురికి కాలువలో పడేసి.. అక్కడి నుంచి వెళ్లిపోయాడు.

ఈ మేరకు గుర్తుతెలియని మృతదేహం కింద కేసు నమోదు చేసుకున్న పోలీసులు.. సీసీ కెమెరాల సాయంతో నిందితుడిని పట్టుకున్నారు. కటకటాల్లోకి పంపించారు.