Gaming and betting gang arrested: సైబరాబాద్‌లో గేమింగ్, బెట్టింగ్ ముఠాను పోలీసులు అరెస్టు చేశారు. డిసెంబర్లో చేవెళ్లకు చెందిన హర్షవర్ధన్‌ అనే విద్యార్థి నుంచి రూ.98.47 లక్షలు ఈ ముఠా కాజేసింది. దిల్లీ కేంద్రంగా నడుస్తున్న ఈ దందాలో.. 9 మంది ముఠా సభ్యులను సైబర్ క్రైం పోలీసులు అరెస్టు చేశారు. వివిధ వెబ్‌సైట్ల ద్వారా నిరుద్యోగుల సమాచారాన్ని సేకరించి వారిని మోసం చేస్తున్నారని పోలీసులు తెలిపారు. నిందితుల ఖాతాల్లోని రూ.24 కోట్ల నగదును సీజ్ చేసినట్లు పేర్కొన్నారు.
వారి నుంచి చెక్‌బుక్‌లు, 193 మొబైల్ ఫోన్లు, 98 స్టాంపులు, 23 పీవోఎస్‌ యంత్రాలు, 21 ల్యాప్టాప్లు, డెబిట్‌ కార్డులను పోలీసులు స్వాధీనం చేసుకున్నట్లు తెలిపారు. నిరుద్యోగుల సమాచారం సేకరించిన ముఠా సభ్యులు వారికి ఫోన్‌ చేసి ఉద్యోగం ఇస్తామని నమ్మిస్తున్నారని, ప్రాసెసింగ్‌ ఫీజులు, ఇతర ఖర్చుల కింద వారి నుంచి డబ్బులు వసూలు చేస్తున్నారని పోలీసులు తెలిపారు. కొంత డబ్బు చెల్లించిన తర్వాత మోసపోయామని గుర్తించిన బాధితులు.. పోలీసులను ఆశ్రయిస్తున్నారని చెప్పారు. ఈ ముఠాపై లోతుగా దర్యాప్తు చేస్తున్నట్లు సైబరాబాద్ పోలీసులు వెల్లడించారు.