యాదాద్రి భువనగిరి జిల్లా రాజపేట మండలం కుర్రారం గ్రామ శివారులోని దోసల వాగులో గల్లంతైన(Missing young woman) హిమబిందు(23) ఆచూకీ కోసం ఎన్డీఆర్‌ఎఫ్(NDRF) బృందాలు గాలింపు చర్యలు చేపట్టారు. వరద ఉద్ధృతికి సోమవారం ఇద్దరు యువతులు కొట్టుకుపోయారు. సోమవారం సాయంత్రం పారుపల్లి వాగు శివారులో సింధూజ (26) మృతదేహం లభ్యమైంది. మరో యువతి ఆచూకీ కోసం గాలింపు చర్యలు ముమ్మరం చేశారు.
ఏం జరిగింది?
యాదాద్రి భువనగిరి జిల్లా రాజపేట మండలం కుర్రారం వద్ద.... వాగులో పడి ఇద్దరు యువతులు గల్లంతయ్యారు. యాదగిరిగుట్ట నుంచి రాజపేట మండలం బొందుగులకు గ్రామంలో ఓ ఫంక్షన్కు ఓ యువకుడు, ఇద్దరు యువతులు ద్విచక్రవాహనంపై వెళ్తుండగా దోసలవాగు ఉద్ధృతిలో బైక్ మీది నుంచి పడిపోయారు. ముగ్గురు చేతులు పట్టుకొని నెమ్మదిగా నడుస్తూ ముందుకు వెళ్లే ప్రయత్నంచేశారు. కానీ నీటి ఉద్ధృతికి సింధూజ(26), హిమబిందు(23) కొట్టుకుపోయారు. యువకుడు ప్రాణాలతో బయటపడ్డాడు. గల్లంతైన వారిలో సింధూజ మృతదేహం లభించగా.. బిందు కోసం గాలిస్తున్నారు. మృతురాలు జనగామ జిల్లా చిన్నకోడూరు వాసిగా గుర్తించారు.