Myron Mohit arrested in drug case: రాంగోపాల్పేట్ పీఎస్‌ పరిధిలో నవంబర్ 11 నమోదైన కేసు ఆధారంగా దర్యాప్తు చేస్తున్న పోలీసులు.. డ్రగ్స్ కేసులో కీలక నిందితులను అరెస్ట్ చేస్తున్నారు. రాంగోపాల్ పేట పరిధిలో గర్వ్ హరీష్ బెలనీ అనే వ్యక్తి 4.5 గ్రాముల ఎండీఎంఏతో పోలీసులకు పట్టుబడగా.. పోలీసులు అతడిని అరెస్ట్ చేసి విచారించారు. విచారణలో గోవా డ్రగ్ డాన్ ఎడ్విన్ న్యూన్స్, బాల మురుగన్ పేర్లు బయటకు వచ్చాయి. పక్కా ప్రయత్నాలతో వీరిని గోవాలో అరెస్ట్ చేసిన హైదరాబాద్ నార్కొటిక్స్ వింగ్ పోలీసులు.. వారి నుంచి సేకరించిన సమాచారంతో మరో నిందితుడు మోహిత్ అగర్వాల్ అలియాస్ మైరాన్ మోహిత్పై దృష్టి పెట్టారు.
డ్రగ్స్ సరఫరాదారులతో మోహిత్కు లీంకులు: డీజే ఈవెంట్లు నిర్వహించి మత్తు పదార్ధాలు సరఫరా చేస్తున్న మోహిత్ కోసం గోవాలో 10 రోజుల పాటు ప్రత్యేక బృందం రెక్కీ నిర్వహించినా పోలీసుల నుంచి తృటిలో తప్పించుకున్నాడు. కొత్త సంవత్సర వేడుకల వేళ.. మోహితే హైదరాబాద్ వచ్చినట్లు గుర్తించిన రాంగోపాల్ పేట, నార్కొటిక్స్ ఎన్‌ఫోర్స్ మెంట్ పోలీసులు.. జూబ్లీహిల్స్‌లోని ఓ పబ్ సమీపంలో అదుపులోకి తీసుకున్నారు. అతడి నుంచి గ్రాము కొకైన్, చరవాణి స్వాధీనం చేసుకున్నారు. కేసు దర్యాప్తులో భాగంగా అతని చరవాణి స్వాధీనం చేసుకున్న పోలీసులు.. 50మందికి పైగా సరఫరాదార్లతో మోహిత్కు లింకులు ఉన్నట్లు గుర్తించారు.
పార్టీలు నిర్వహిస్తూ కొకైన్కు బానిసగా మారిన మోహిత్ పలువురికి డ్రగ్స సరఫరా చేస్తున్నట్లు గుర్తించారు. గోవాలో డ్రగ్ కింగ్ పిన్‌గా ఎదిగిన ఎడ్విన్ న్యూన్స్ లింకులు దేశవ్యాప్తంగా ఉన్నాయి. వివిధ రాష్ట్రాల్లో మాదక ద్రవ్యాలు సరఫరా చేస్తున్న వారిని విచారిస్తే చివరకు ఎడ్విన్ పేరే వినిపిస్తోంది. తాజాగా మోహిత్ తో పాటు మన్యం క్రిష్ణ కిషోర్ రెడ్డి అనే వ్యాపార వేత్తను సైతం పోలీసులు అరెస్ట్ చేశారు. వీరిద్దరికి ఎడ్విన్ కామన్ ఫ్రెండ్గా ఉన్నాడు. చరవాణిలో అతని కాంటాక్ట్ను పోలీసులు గుర్తించారు. హైదరాబాద్‌లో కేఎంసీ ప్రైవేట్‌ లిమిటెడ్‌ సంస్థను నడుపుతున్న మన్యం క్రిష్ణ కిషోర్ రెడ్డి.. తరచూ పబ్బుల్లో స్నేహితులకు పార్టీలు ఇస్తుంటాడు.