కుటుంబ కలహాలతో వివాహిత బలవన్మరణం

పుట్టింటికి వచ్చిన ఓ వివాహిత చెరువులో దూకి బలవన్మరణానికి పాల్పడిన ఘటన కామారెడ్డి జిల్లాలో జరిగింది. కుటుంబ కలహాల కారణంగానే ఆమె ఆత్మహత్య చేసుకుందని బాధితురాలి కుటుంబ సభ్యులు పేర్కొన్నారు.

కుటుంబ కలహాల కారణంగా పద్మ అనే వివాహిత చెరువులో దూకి ఆత్మహత్యకు పాల్పడింది. ఈ ఘటన కామారెడ్డి జిల్లా మాచారెడ్డి మండల కేంద్రంలో జరిగింది.

జిల్లాలోని మాచారెడ్డి మండల కేంద్రానికి చెందిన నాయికోటి పద్మకు నిజామాబాద్ జిల్లా ముప్కాల్ మండలం నాగంపేట్ గ్రామానికి చెందిన నరేష్​తో 13 ఏళ్ల క్రితం వివాహం జరిగింది. భర్త ఉపాధి కోసం గల్ఫ్​కు వెళ్లగా.. కూతురు శ్రీనిధి(12)తో ఆమె కలిసి ఉంటోంది. ఈ క్రమంలో పది రోజుల క్రితం పుట్టింటికి వచ్చిన పద్మ ఊర్లోని చెరువులో దూకి ఆత్మహత్య చేసుకుంది. కుటుంబ కలహాల కారణంగానే ఆమె బలవన్మరణానికి పాల్పడిందని బాధితురాలి కుటుంబ సభ్యులు ఆరోపించారు. కేసు నమోదు చేసిన పోలీసులు దర్యాప్తు ప్రారంభించారు.