సీఎం ఇంటి ముట్టడికి వచ్చిన వారిపై అత్యాచారం కేసు !

ఏపీ సీఎం జగన్ ఇంటి ముట్టడికి యత్నించిన టీఎన్​ఎస్​ఎఫ్ నేతలపై అత్యాచారయత్నం కింద తాడేపల్లి పోలీసులు కేసు నమోదు చేశారు. న్యాయమూర్తి ముందు ప్రవేశపెట్టి రిమాండ్ రిపోర్టు కోర్టుకు సమర్పించగా.. రిపోర్టు చూసిన న్యాయమూర్తి ఆశ్చర్యపోయారు. సీఎం ఇంటి ముట్టడికి వచ్చిన వారిపై అత్యాచారం కేసా ? అంటూ ఆగ్రహం వ్యక్తం చేశారు.

ఏపీలోని గుంటూరు జిల్లా తాడేపల్లి పోలీసుల తీరుపై న్యాయమూర్తి ఆగ్రహం వ్యక్తం చేశారు. శుక్రవారం సీఎం జగన్ ఇంటి ముట్టడికి యత్నించిన టీఎన్​ఎస్​ఎఫ్ నేతలను పోలీసులు అరెస్టు చేశారు. ఇవాళ వారిని మంగళగిరి కోర్టులో హాజరుపరిచారు. విద్యార్థి నేతలు అత్యాచారయత్నానికి పాల్పడినట్లు పోలీసులు రిమాండ్ రిపోర్టు రాసి కోర్టుకు సమర్పించారు.

రిమాండ్​ రిపోర్ట్​

రిపోర్టు చూసి ఆశ్చర్యపోయిన న్యాయమూర్తి.. పోలీసుల తీరుపై ఆగ్రహం వ్యక్తం చేశారు. సీఎం ఇంటి ముట్టడికి వచ్చిన వారిపై అత్యాచారం కేసా ? అని ప్రశ్నించారు. నాలుక్కరుచుకున్న పోలీసులు రిమాండ్ రిపోర్టు మార్చి మళ్లీ న్యాయమూర్తి వద్దకు తీసుకెళ్లారు. రిమాండ్ రిపోర్టులో సెక్షన్లు సరిగానే నమోదు చేసినప్పటికీ.. రేప్ అటెంప్ట్ అనే పదాలు వాడటంతో న్యాయమూర్తి ఆగ్రహానికి గురయ్యారు.

ఇదీ చదవండి: ఎస్సీ, ఎస్టీ కేసు పెట్టారని వ్యక్తి ఆత్మహత్య