నైజం మార్చుకోని నాగోరావు.. మాయమాటలతో సహచర ఖైదీ భార్యకు వల.. ఆపై

Prisoner Nagorao In Adilabad Jail Case: ఆదిలాబాద్‌ జిల్లా జైలు నుంచి ఖైదీ పరారైన ఘటన..... కీలక మలుపు తిరిగింది. కారాగారం నుంచి పారిపోయిన నాగోరావు.... సహచరఖైదీ భార్యపై అత్యాచారం చేసినట్లు తేలింది. అతడు ఇప్పటికే మైనర్‌ బాలిక అపహరణ, అత్యాచారం కేసులో జైలు జీవితం అనుభవిస్తున్నాడు. నాగోరావు పరారీపై జిల్లా సబ్‌జైల్‌ అధికారి అశోక్‌కుమార్‌ నేతృత్వంలో విచారణ కొనసాగుతోంది.

Prisoner Nagorao In Adilabad Jail Case:మహారాష్ట్ర పర్సోడికి చెందిన టేకం నాగోరావు.. ఆదిలాబాద్‌ జిల్లా జైలులో శిక్ష అనుభవిస్తున్నాడు. తాంసి మండలానికి చెందిన ఓ బాలికను అపహరించి అత్యాచారం చేసిన కేసులో.. పోక్సో చట్టం కింద 2016లో పదేళ్ల జైలు శిక్ష పడింది. వరంగల్‌ జిల్లా జైల్లో శిక్ష అనుభవిస్తున్న నాగోరావును... గత జూన్‌లో ఆదిలాబాద్‌ జైలుకు మార్చారు. సత్ప్రవర్తనతో మెలుగుతున్నాడని భావించిన అధికారులు.... గేదెలు మేపడానికి, పాలుపితకడానికి వెసులుబాటు కల్పించారు. నాగోరావుతోపాటు మరో సహచర ఖైదీ కూడా గేదెలు మేపడానికి వెళ్లేవాడు. ఈ క్రమంలో ఇద్దరి మధ్య స్నేహం కుదిరింది.

సహచర ఖైదీ భార్యతోనూ నాగోరావుకు పరిచయం ఏర్పడింది. ఈనెల 23న ఆమె ములాఖత్‌లో భాగంగా జైలుకు వచ్చి వెళ్లింది. ఆమెకు మాయ మాటలు చెప్పి.. ఈనెల 24న మళ్లీ జైలు పరిసర ప్రాంతాలకు రప్పించాడు. ఆ రోజు పశువులను మేపడానికి వెళ్లేటప్పుడు.. జైలు సూపరింటెండెంట్‌ శోభన్‌బాబుకు చెందిన కుక్కపిల్లను తీసుకెళ్లాడు. పశువులు మేపే ప్రాంతానికి రక్షణగా ప్రహారి గోడలాంటి దేమీలేదు. జైలు సూపరింటెండెంట్‌ శునకాన్ని జైలు వెనక కట్టేసి పరారయ్యాడు. కుక్క అరుపులు గుర్తించిన జైలు సిబ్బంది... అక్కడికి వెళ్లారు. నాగోరావు పరారైనట్లు గుర్తించారు.

కారాగారం నుంచి తప్పించుకుని వెళ్లిన నాగోరావు.. సహచర ఖైదీ భార్యపై అత్యాచారానికి పాల్పడ్డాడు. పోలీసులు గాలింపు చేపట్టగా.. జైనథ్‌ మండలం పరిధిలోని కోరట-చనాఖ బ్యారేజీ సమీప ప్రాంతంలో సహచరఖైదీ భార్య దాదాపుగా అపస్మారకస్థితిలో పడి ఉంది. ఆమెను విచారించగా.... అత్యాచారం జరిగినట్లు తేలింది. విషయం తెలిసి జైలులో శిక్ష అనుభవిస్తున్న ఆమె భర్త మానసికంగా కుంగిపోయినట్లు తెలిసింది. ఈ విషయాన్ని జైలు అధికారులు బయటకు పొక్కనీయడంలేదు.

నాగోరావు ప్రవర్తనను జైలు అధికారులు పసిట్టకపోవడమే పరారీకి కారణమైనట్లు తెలుస్తోంది. విధి నిర్వహణలో ఉన్న ఐదుగురు సిబ్బంది.. పరారీ విషయాన్ని పసిగట్టకపోవడం విమర్శలకు తావిస్తోంది. గతేడాది మార్చి 24న జైలు గదిలోనే అప్పటి అండర్‌ ట్రయల్‌ ఖైదీ ఫారూఖ్‌ అహ్మద్‌ ఆత్మహత్య ఘటననే రాష్ట్రవ్యాప్తంగా కలకలం సృష్టించింది. ఆ తర్వాతైనా భద్రతను కట్టుదిట్టం చేయాల్సిన అధికారులు.. నిర్లక్ష్యంగా వ్యవహరించడంతోనే తాజా ఘటన వెలుగులోకి వచ్చిందనే ఆరోపణలు వినిపిస్తున్నాయి.

ఇదీ చదవండి:Bus accident: నిశ్చితార్థానికి వెళ్తుండగా ఘోర ప్రమాదం.. చిన్నారితో సహా ఎనిమిది మంది మృతి