మహబూబాబాద్ జిల్లా దంతాలపల్లి మండలం కుమ్మరికుంట్ల గ్రామానికి చెందిన చిరగాని నర్సయ్య(86), చిరగాని సోమక్క(70) భార్యాభర్తలు. వీరికి ఇద్దరు కుమార్తెలు, నలుగురు కుమారులు. నర్సయ్య గత కొంత కాలంగా వృద్ధాప్యంతో బాధపడుతున్నారు. కాగా గత నెల మొదటి వారంలో వీరి పెద్ద కుమారుడు కొవిడ్‌ బారిన పడి కోలుకున్నారు. అనంతరం సోమక్కకు కరోనా సోకింది. శ్యాసకోస సమస్యతో గత నెల 14న తొర్రూరులోని ఓ ప్రైవేటు ఆసుపత్రిలో చేరింది.
చికిత్సపొందుతూనే సోమక్క మృతి
ఆరోగ్య పరిస్థితి విషమించడంతో మెరుగైన వైద్యం కోసం కుటుంబ సభ్యులు.. సోమక్కని వరంగల్లోని ఓ ప్రైవేటు ఆస్పత్రికి తరలించారు. వారం రోజుల పాటు చికిత్సను అందించారు. ఊపిరితిత్తులు దెబ్బతిన్నట్లు నిర్ధరించిన వైద్యులు ఆమెను వెంటిలేటర్‌పై ఉంచాలని చెప్పారు. దీంతో కుటుంబ సభ్యులు ఆమెను ఇంటికి తీసుకొచ్చి నిత్యం ఆక్సిజన్‌ అందిస్తున్నారు. ఈ క్రమంలో తీవ్ర అస్వస్థతకు గురై ఈరోజు తెల్లవారుజామున సోమక్క మృతి చెందింది.