దొంగతనం చేసి కల్లు తాగారు... వింత చేష్టలతో ఆస్పత్రి పాలయ్యారు

సరదాగా... ఈత వనంలో ఉన్న కల్లు దొంగిలించారు. ఇంట్లో పిల్లల దగ్గర్నుంచి అందరూ ఆహ్లాదంగా ఆ కల్లును సేవించారు. అప్పటివరకు బాగానే ఉంది. కాసేపయ్యాక... అందరూ వింతగా ప్రవర్తించటం ప్రారంభించారు. కిందపడి దొర్లుతున్నారు. గమనించిన స్థానికులు ఆస్పత్రికి తీసుకెళ్లాగా... అసలు విషయం బయటికొచ్చింది.

కల్లు తాగిన కొంత మంది వింత చేష్టలు చేస్తూ... ఆస్పత్రి పాలైన ఘటన నాగర్​కర్నూల్​ జిల్లా పెద్దకొత్తపల్లి మండలం చిన్న కార్పాములలో జరిగింది. గ్రామానికి చెందిన బంగారయ్య, మల్లయ్య అనే వ్యక్తులు గ్రామ పరిసరాల్లో ఉన్న ఈత వనంలో కల్లు దొంగిలించి ఇంటికి తీసుకొచ్చారు. కుటుంబ సభ్యులందరితో కలిసి ఆ కల్లును సేవించారు. కల్లు తాగిన కొద్దిసేపటికే కుటుంబసభ్యులంతా వింతవింతగా ప్రవర్తిస్తూ... పిచ్చి చేష్టలు చేయటం మొదలుపెట్టారు.

ఈ విషయాన్ని గమనించిన చుట్టుపక్కల వ్యక్తులు... పోలీసులకు సమాచారం ఇచ్చారు. అంబులెన్స్​లో స్థానిక ఆస్పత్రికి తరలించారు. ప్రథమ చికిత్స అనంతరం బాధితులను జిల్లా ఆస్పత్రికి తరలించి చికిత్స అందించారు. వింత చేష్టలతో బాధితులు చికిత్సకు సహకరించకపోవటం వల్ల... వైద్యులు ఇబ్బంది పడాల్సివచ్చింది. ఈ ఘటనలో ఆరుగురు అస్వస్థత చెందగా... ఇందులో నాలుగురి పరిస్థితి సాధారణంగా ఉందని వైద్యులు తెలిపారు. మిగతా ఇద్దరి పరిస్థితి విషమంగా మారటం వల్ల మహబూబ్​నగర్​ జిల్లాస్పత్రికి తరలించామన్నారు. కల్లులో ఓ రకమైన మత్తు పదార్థాలు కలిసినట్లు వైద్యులు నిర్ధరించారు.

ఇదీ చూడండి: వాటర్ బాటిల్ తెచ్చుకుంటానని చెప్పి భార్య పరార్​.!