Gold Smuggling in Hyderabad: నటుడు సూర్య నటించిన.. "వీడొక్కడే" సినిమా తరహాలో జరుగుతున్న బంగారం స్మగ్లింగ్ వ్యవహారం బయటపడింది. ఆ సినిమాలో ఓ గ్యాంగ్.. కొంతమందిని ఎంచుకుని విదేశాలకు పర్యాటకులుగా పంపిస్తుంది. అయితే.. వారితో పాటు పలువిధాలుగా డ్రగ్స్, బంగారం, డైమండ్స్ లాంటివాటిని స్మగ్లింగ్ చేయిస్తుంది. అచ్చం అలాంటి దందానే.. ఒకటి హైదరాబాద్లోనూ వెలుగుచూసింది.
ఈ హైదరాబాద్ గ్యాంగ్ కూడా బంగారం స్మగ్లింగ్ చేయించేందుకు.. దుబాయ్ చూడాలన్న ఆసక్తి ఉన్న వారిని ఎంపిక చేసుకుంటుంది. ఇలా.. కొంతమందిని ఎంచుకుని పర్యాటక వీసాపై సొంత ఖర్చులతో దుబాయ్‌కి పంపుతున్నారు. కేవలం పంపటమే కాదు.. దుబాయ్ నుంచి హైదరాబాద్కు తిరిగి వచ్చేటప్పుడు అక్రమ బంగారం అప్పజెప్తున్నారు. పోలీసులకు పట్టుబడకుండా హైదరాబాద్కు బంగారం తీసుకువస్తే డబ్బు ఇస్తామని ఆశ చూపుతున్నారు. వారి ఆఫర్కు ఆకర్షితులవుతున్న కొందరు యువకులు స్మగ్లింగ్కు పాల్పడుతున్నారు. అంతా అనుకున్నట్టు జరిగి కొందరు.. క్షేమంగా ఇంటికి చేరితే.. మరికొందరు పోలీసులకు దొరికి కటకటాలపాలవుతున్నారు.
ఇలా.. ఆకర్షితులైన సనత్‌నగర్కు చెందిన షెహబాజ్, అయాజ్, ఫహద్‌ను స్మగ్లర్లు 15 రోజుల క్రితం దుబాయ్‌కి పంపారు. ప్లాన్లో భాగంగా.. షెహబాజ్, అయాజ్ కలిసి అక్రమ బంగారాన్ని ఎవరికీ దొరకకుండా హైదరాబాద్కు తెచ్చారు. ఫహద్ మాత్రం.. నగరానికి తిరిగిరాకుండా దుబాయ్‌లోనే తప్పించుకున్నాడు. ఈ విషయాన్ని తెలుసుకున్న ముఠా.. ఫహద్ ఆచూకీ కోసం అతడి తండ్రిని కిడ్నాప్ చేశారు. అనంతరం.. షెహబాజ్, అయాజ్, అసిమ్‌ను కూడా కిడ్నాప్ చేశారు. ఫహద్ ఆచూకీ చెప్పాలంటూ.. శాస్త్రిపురంలోని ఓ ఇంట్లో బంధించి చిత్రహింసలు పెట్టారు.
బాధితుల కుటుంబసభ్యులు తీవ్ర భయాందోళనకు గురై.. పోలీసులను ఆశ్రయించారు. బాధితుల కుటుంబసభ్యుల ఫిర్యాదుతో ఇన్ని రోజులు గుట్టుగా సాగిన స్మగ్లింగ్ దందా వెలుగులోకి వచ్చింది. కేసు నమోదు చేసుకున్న సనత్‌నగర్ పోలీసులు దర్యాప్తు చేస్తున్నారు. స్మగ్లింగ్ ముఠాను పట్టుకునేందుకు పోలీసులు గాలింపు చేపట్టారు. ఆ ముఠా పట్టుబడితే.. ఈ దందా ఎప్పటి నుంచి సాగుతోంది..? ఇప్పటివరకు ఎంత బంగారం స్మగ్లింగ్ చేశారు..? ఇందులో ఎవరెవరు భాగస్వామ్యులయ్యారు..? ఒక బంగారమేనా.. డ్రగ్స్ లాంటివి కూడా స్మగ్లింగ్ చేస్తున్నారా..? అన్న అంశాలపై స్పష్టత రానుంది.
ఇవీ చూడండి:
