ప్రభుత్వాస్పత్రిలో అగ్ని ప్రమాదం.. విలువైన సామాగ్రి దగ్ధం

నిజామాబాద్ ప్రభుత్వ ఆస్పత్రిలో అగ్ని ప్రమాదం చోటు చేసుకుంది. ఈ ఘటనలో విలువైన సామాగ్రి దగ్ధమైనట్లు ఆస్పత్రి వర్గాలు తెలిపాయి. షార్ట్ సర్క్యూట్ కారణంగా ఈ ప్రమాదం జరిగిందని వెల్లడించాయి.

నిజామాబాద్ జిల్లా కేంద్రంలోని ప్రభుత్వ జనరల్ ఆస్పత్రిలో శనివారం ఉదయం అగ్నిప్రమాదం సంభవించింది. షార్ట్ సర్క్యూట్ కారణంగా జరిగిన ఈ ప్రమాదంలో అత్యంత విలువైన సీటీ స్కాన్ యంత్రం దగ్ధమైందని ఆస్పత్రి వర్గాలు తెలిపాయి. సమాచారం అందుకున్న అగ్నిమాపక శాఖ సిబ్బంది... వెంటనే అప్రమత్తమై మంటలను అదుపులోకి తీసుకువచ్చారు.

ఆస్పత్రిలో ఒక్కసారిగా పొగలు రావడంతో అక్కడ చికిత్స పొందుతున్నవారు, వారి సహాయకులు, సిబ్బంది భయాందోళనకు గురయ్యారు. అగ్నిప్రమాదంపై పోలీసులు సమీక్షించారు. ఈ ఘటనపై దర్యాప్తు చేస్తున్నట్లు తెలిపారు.

ఇదీ చదవండి:ఆక్సిజన్​ కొరతతో 8 మంది కరోనా రోగులు మృతి