AP Ambulance Mafia : ఏపీలో వరుసగా అమానవీయ ఘటనలు వెలుగుచూస్తున్నాయి. ఓవైపు వరుసగా చిన్నారులు మృత్యువాత పడటం కలచివేస్తోంటే.. వారి మృతదేహాలను స్వగ్రామాలకు తరలించేందుకు అంబులెన్సులు నిరాకరిస్తూ కర్కశంగా వ్యవహరిస్తున్నారు. మొన్న తిరుపతి రుయా ఆస్పత్రిలో అంబులెన్స్ మాఫియా వల్ల బాలుడి మృతదేహాన్ని ఓ తండ్రి బైక్పై తీసుకెళ్లగా.. అచ్చం అలాంటి ఘటనలే వరుసగా వెలుగుచూస్తున్నాయి. అప్పటికే కడుపున పుట్టిన పిల్లలు చనిపోయి పుట్టెడు దుఃఖంలో ఉంటే.. వారి మృతదేహాలని ఇంటికి తీసుకెళ్లేందుకు సహకరించకుండా పాశానాల్లా ప్రవర్తిస్తూ.. వారి బాధను రెట్టింపు చేస్తున్నారు.
AP Ambulance Mafia News : తిరుపతిలో రుయా ఘటన చర్చనీయాంశమై రెండు రోజులు కాకముందే.. జిల్లాలోని నాయుడుపేటలో మరో చోట అంబులెన్స్ సిబ్బంది అదే తీరు అవలంభించి.. బాధలో ఉన్న మరో తండ్రిని ఇబ్బందిపెట్టారు. దొరవారిసత్రం మండలం కొత్తపల్లిలో.. గురువారం రోజు శ్రవంత్, అక్షయ అనే అన్నాచెల్లెల్లు గ్రావెల్ గుంతలో పడి నీటిమునిగారు. శ్రవంత్‌ను అక్కడే ఉన్న గొర్రెల కాపరి కాపాడగా.. అక్షయ పరిస్థితి విషమించింది. నాయుడుపేట ఆస్పత్రికి తరలించేలోగా చిన్నారి మృతి చెందింది. కడివెడు దుఃఖంలో మునిగిపోయిన ఆ తండ్రి.. చిన్నారిని ఇంటికి తరలించేందుకు అంబులెన్స్ ఇవ్వాలని అడిగితే ఏమాత్రం కనికరం లేకుండా నిరాకరించారు. ఆటో డ్రైవర్లను బతిమాలినా ముందుకురాలేదు. భుజాల మీద ఎత్తుకుని ఆడించిన ఆ తండ్రి.. విగతజీవిగా మారిన కూతురిని అదే భుజానా వేసుకుని ద్విచక్రవాహనంపై ఇంటికి తీసుకెళ్లాడు.