మనీ ట్రాన్స్ఫర్ చేసి.. క్యాష్ తీసుకున్నారా..? అయితే ఇది మీకూ జరిగుంటుంది..! "నాకు కొంచెం క్యాష్ అవసరముంది. అయితే అకౌంట్లో బ్యాలెన్స్ ఉంది కానీ.. చేతిలో నగదు లేదు. యాప్(మనీ ట్రాన్స్ఫర్ యాప్స్) ద్వారా మీ అంకౌంట్కు మనీ ట్రాన్స్ఫర్ చేస్తా.. చేతికి డబ్బు ఇస్తారా.. ప్లీజ్ ?"
"ఓ.. దాందేముంది.. పంపించండి. ఇస్తా..!"
"ఇప్పుడే పంపిస్తున్నా..!! ఇదిగో పంపించాను. చూడండి(మనీ సెండ్/కట్ అయినట్టుగా వచ్చిన సందేశం చూపిస్తూ..). ఒకసారి చెక్ చేసుకోండి.. మీకు వచ్చాయా..?"
"మీకు వెళ్లినట్టు వచ్చింది కదా.. ఇంకేంటి..! ఎక్కడికిపోతాయి.. అవే వస్తాయి లెండి.. ఓ నిమిషం అటు ఇటూ..!!"
ఇలాంటి సంభాషణ మనం దుకాణాల దగ్గరో.. స్నేహితుల మధ్యో.. తరచూ వింటుంటాం. అకస్మాత్తుగా ఏదో అవసరం వచ్చి పడుతుంది. అది తీర్చుకోవాలంటే డబ్బు కావాలి. కానీ.. జేబులో సరిపడ పైసలుండవు. అకౌంట్లో ఉన్నా.. దగ్గర్లో ఏటీఎంలుండవు. అలాంటి సమయంలోనే ఇలాంటి సన్నివేశం చోటుచేసుకుంటుంది. మన మీద నమ్మకంతోనో.. లేదా డబ్బులు పంపించినట్టు మొబైల్లో చూపించిన సందేశంతోనో.. వాళ్లకు డబ్బు వచ్చినట్టు నిర్ధరించుకో ముందే నగదు చేతికిచ్చేయటమో.. దుకాణాల్లో వస్తువులు ఇచ్చేయటమో.. చేస్తుంటారు. అయితే.. ఇక్కడే అసలు సమస్య మొదలవుతోంది. ఇలాంటి నమ్మకాన్నే ఆసరాగా చేసుకుని కొందరు దుండగులు.. ఫేక్ యాప్స్ ద్వారా డబ్బులు పంపించినట్టు నకిలీ సందేశాలు చూపించి మోసాలకు తెరతీస్తున్నారు. హైదరాబాద్లోని వనస్థలిపురం పరిధిలో జరిగిన ఘటనతో ఈ మోసం బయటపడింది.
వనస్థలిపురం పోలీస్స్టేషన్ పరిధిలోని సుష్మ సమీపంలో ఉన్న ఓ మనీట్రాన్స్ఫర్ దుకాణానికి ఈనెల 9న ఓ యువకుడు వచ్చాడు. తనకు అర్జెంటుగా 30 వేల నగదు కావాలని.. యాప్ ద్వారా మీకు మనీ ట్రాన్స్ఫర్ చేస్తానని చెప్పాడు. సరేనన్న షాప్ యజమాని.. యాప్ క్యూఆర్ కోడ్ చూపించాడు. వెంటనే దాన్ని స్కాన్ చేసి 30 వేలు పంపించినట్టు సందేశాన్ని చూపించి.. డబ్బు ఇమ్మని కోరాడు. షాప్ యజమాని మాత్రం తనకు డబ్బు వచ్చినట్టు మెస్సేజ్ రాలేదని.. కాసేపు వేచి ఉండమని సూచించాడు. కానీ.. ఆ యువకుడు.. తను వేరే వాళ్లకు అత్యవసరంగా డబ్బు ఇవ్వాల్సి ఉందని.. తొందరగా ఇవ్వాలని.. కాస్త హడావుడి చేశాడు.
అయినా.. ఆ దుకాణదారుడు ఇవ్వలేదు. కనీసం 15 వేలు అయినా ఇవ్వాలని.. తొందరపెట్టాడు. సదరు వ్యక్తి ఎంత హడావుడి చేసినా.. షాప్ యజమాని మాత్రం.. ఒక్క రూపాయి ఇచ్చేది లేదని.. డబ్బు క్రెడిట్ అయినట్టు సందేశం వచ్చాకే ఇస్తానని తెగేసి చెప్పాడు. దీంతో.. ఆ యువకుడు అక్కడి నుంచి మెల్లగా జారుకున్నాడు. అప్పుడు ఆ షాప్ యజమానికి అనుమానం వచ్చింది. డబ్బులు పంపించి తన అకౌంట్ నుంచి కట్ అయ్యాక కూడా.. ఇవ్వకముందే వెళ్లిపోయాడంటే ఇందులో ఏదో మతలబుందని గ్రహించాడు. ఏదో నకిలీ యాప్ ద్వారా పంపించి బురిడీ కొట్టించే ప్రయత్నం చేశాడని నిర్ధరించుకున్నాడు.
అయితే.. ఆ యువకుడు మాత్రం ఐదు నిమిషాల వ్యవధిలోనే.. ఎన్జీవోస్ కాలనీలోని మరో మనీ ట్రాన్స్ఫర్ దుకాణానికి వెళ్లాడు. అచ్చంగా.. ముందు దుకాణంలో చేసిన హడావుడే ఇక్కడా చేశాడు. ఆ దుకాణంలో ఉన్న వ్యక్తి.. యువకుడికి నిజంగానే అత్యవసరముందేమోనని నమ్మి క్రెడిట్ సందేశం రాకముందే.. 30 వేలు ఇచ్చేశాడు. వెంటనే డబ్బు తీసుకుని సదరు యువకుడు అక్కడి నుంచి క్షణాల్లోనే మాయమైపోయాడు. కానీ.. ఆ దుకాణంలో ఉన్న వ్యక్తి మాత్రం గంటల తరబడి చూసినా.. అమౌంట్ క్రెడిట్ కాలేదు. చివరికి.. ఓ ఫేక్ యాప్ ద్వారా తనను మోసం చేశాడని గ్రహించాడు. వెంటనే పోలీసులకు ఫిర్యాదు చేశాడు. కేసు నమోదు చేసుకున్న పోలీసులు దర్యాప్తు చేపట్టారు.
ఇలాంటి గుర్తుతెలియని వ్యక్తులు వనస్థలిపురం పరిధిలోనే గత నెల రోజులలో పలు మనీ ట్రాన్స్ఫర్ దుకాణాలకు వెళ్లినట్లు పోలీసుల పరిశీలనకు వచ్చినట్టు తెలుస్తుంది. ఇలాంటి వ్యక్తుల పట్ల నిరంతరం అప్రమత్తంగా ఉండాలని పోలీసులు సూచిస్తున్నారు. డబ్బులు పంపించినట్టు, తమ అకౌంట్ నుంచి కట్ అయినట్టు సందేశాలు చూపించినంత మాత్రాన నమ్మవద్దని.. డబ్బు క్రెడిట్ అయినట్టు నిర్ధరించుకున్న తర్వాతే నగదు ఇవ్వాలని.. అప్రమత్తంగా ఉన్న దుకాణయజమాని, మోసపోయిన బాధితులు హెచ్చరిస్తున్నారు.
ఇవీ చూడండి:
