Crime Rate Increased in 2021 at AP State: ఆంధ్రప్రదేశ్లో చోరీలు, దోపిడీలు, ఇళ్ల లూటీలు.. రోజురోజుకు పెరుగుతున్నాయి. సగటున రోజుకు 41 చోరీలు, దోపిడీలు జరుగుతున్నట్లు నివేదికలు చెబుతున్నాయి. అంటే రోజుకు సగటున రూ.15.59 లక్షల సొత్తును దొంగల పాలవుతుంది. 2020తో పోలిస్తే 2021 జనవరి నుంచి నవంబరు వరకు ఈ తరహా నేరాలు 15.37 శాతం మేర పెరిగాయి. నిరుడు తొలి 11 నెలల వ్యవధిలో ఆ రాష్ట్రంలో 1,27,127 కేసులు నమోదు కాగా.. అందులో 10.98 శాతం ఘటనలు చోరీలు, బందిపోటు దొంగతనాలు, దోపిడీలు, ఇల్లు కొల్లగొట్టడాలు, లాభం కోసం హత్యల వంటి సంఘటనలే. ఆర్థిక సంబంధమైన నేరాలుగా (ప్రాపర్టీ అఫెన్సెస్‌) పరిగణించే వీటిల్లో 73.67 శాతం చోరీలే ఉన్నాయి.
రోజుకు రూ.15.59 లక్షల సొత్తు దొంగల పాలు
- మొత్తం 18 పోలీసు యూనిట్లకుగాను రాజమహేంద్రవరం అర్బన్‌, విశాఖపట్నం సిటీ, పశ్చిమగోదావరి, నెల్లూరు, ప్రకాశం, చిత్తూరు, కడప, విజయనగరం జిల్లాల పరిధిలో రూ.56.91 కోట్ల విలువైన సొమ్ము పోయింది. అంటే రోజుకు సగటున రూ.15.59 లక్షల సొత్తును దొంగలు దోచుకున్నారు.
- విశాఖ నగరంలో రోజుకు సగటున రూ.1,77,808 విలువ గల సొత్తును దొంగలు దోచుకున్నారు.
- విజయనగరం జిల్లాలో 2020లో జరిగిన దొంగతనాల్లో రూ.1.34 కోట్ల విలువైన సొత్తు పోగా, 2021లో రూ.2.07 కోట్ల సొత్తు పోయింది.