కానిస్టేబుల్ మిస్సింగ్... కారణం అదేనా?

ఇష్టం లేని చోటుకు తనను బదిలీ చేశారని ఓ కానిస్టేబుల్ అదృశ్యమైన ఘటన యాదాద్రిలో చోటు చేసుకుంది. కేసు నమోదు చేసుకుని దర్యాప్తు ప్రారంభించామని గుండాల ఎస్సై తిరుపతి రెడ్డి తెలిపారు.

యాదాద్రి భువనగిరి జిల్లా గుండాల పోలీసు స్టేషన్​లో జలీల్​ పటేల్​... కానిస్టేబుల్​(పి.సి.నెం 4281)గా విధులు నిర్వర్తిస్తున్నాడు. బదిలీల్లో భాగంగా అధికారులు అతనిని నల్గొండకు ట్రాన్స్​ఫర్ చేశారు.

ఇదే విషయమై జలీల్​... ఈనెల 15న సాయంత్రం 5.30 గంటల సమయంలో తన తమ్ముడు రశీద్​కు ఫోన్ చేశాడు. తనను అన్యాయంగా గుండాల పోలీసుస్టేషన్​ నుంచి నల్గొండకు బదిలీ చేశారని... తనకు వెళ్లడం ఇష్టం లేదని తెలిపినట్లు కుటుంబసభ్యులు తెలిపారు. అనంతరం ఫోన్​ ఆఫ్ చేసి.. ఆచూకీ లేకుండా ఎక్కడికో వెళ్లిపోయాడని తెలిపారు. జలీల్​ తండ్రి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నట్లు ఎస్సై తిరుపతి రెడ్డి తెలిపారు.

ఇదీ చూడండి:హైకోర్టు న్యాయవాది దంపతులను నరికిచంపిన దుండగులు