వస్త్ర దుకాణంలో దారుణం.. బాత్‌రూంలో రహస్యంగా కెమెరా పెట్టి..

16:50 May 26

వస్త్ర దుకాణంలో దారుణం.. బాత్‌రూంలో రహస్యంగా కెమెరా పెట్టి..

మహిళల ఆత్మగౌరవానికి భంగం కల్గించే మరో ఘటన హైదరాబాద్‌లో వెలుగు చూసింది. చుట్టూ పొంచి ఉన్న పోకిరీలతో ఎంత అప్రమత్తంగా ఉన్నా.. ఏదో ఓ రూపంలో మహిళలు ఇబ్బంది పడుతూనే ఉన్నారు. పోకిరీల వికృత చేష్టలతో.. ఎక్కడికి వెళ్లిన సేఫ్టీ అనే మాటకు గ్యారంటీ లేదు అనే నిర్ణయానికి మహిళాలోకం వచ్చేలా చేస్తున్నారు. ఓ వస్త్రదుకాణంలో బాత్​రూంలో రహస్యంగా కెమెరా పెట్టి మహిళల చిత్రాలు సేకరించాడు ఓ క్లీనింగ్​ బాయ్​. ఏడాది క్రితం చోటుచేసుకున్న ఈ ఘటన ఇప్పుడు చర్చనీయాంశమైంది.

బంజారాహిల్స్ లోని ఓ వస్త్ర దుకాణంలో రహస్య కెమెరా ఉంచిన వైనం బయటపడింది. అందులో పనిచేసే క్లీనింగ్ బాయ్ ఈ పని చేసినట్లు పోలీసులు ప్రాథమికంగా గుర్తించారు. ఏడాది క్రితం ఈ ఘటన చోటు చేసుకున్నప్పటికీ.. బాధితురాలు బంజారాహిల్స్ పోలీసులకు ఈ రోజు ఫిర్యాదు చేయడంతో విషయం బయటికొచ్చింది. వస్త్ర దుకాణంలో పనిచేసే మహిళ చరవాణికి తన అర్ధనగ్న దృశ్యాలు వచ్చాయి. అందులో పనిచేసే క్లీనింగ్ బాయ్ మొబైల్ నుంచి ఈ దృశ్యాలు వచ్చినట్లు మహిళ గుర్తించింది. దృశ్యాలు పంపించడమే కాకుండా ఆమెను వేధించడంతో బాధితురాలు పోలీసులకు ఫిర్యాదు చేసింది.

కేసు నమోదు చేసుకొని దర్యాప్తు చేపట్టిన పోలీసులు... క్లీనింగ్ బాయ్ బంగాల్​కు చెందిన వాడిగా గుర్తించారు. నిందితుడిని అదుపులోకి తీసుకొని ప్రశ్నిస్తే పూర్తి వివరాలు తెలుస్తాయని పోలీసులు భావిస్తున్నారు. క్లీనింగ్ బాయ్ కేవలం వస్త్ర దుకాణంలో పనిచేసే తోటి మహిళల చిత్రాలే సేకరించాడా లేకపోతే డ్రెస్సింగ్ రూమ్​లోనూ కెమెరాలేమైనా పెట్టాడా అనే కోణంలో దర్యాప్తు చేస్తున్నారు. చరవాణి ద్వారా చిత్రాలు సేకరించాడా లేకపోతే రహస్య సీసీ కెమెరాలు ఏమైనా ఏర్పాటు చేశాడా అనే కోణంలోనూ దర్యాప్తు చేస్తున్నారు. నిందితుడి చరవాణి ఆధారంగా పోలీసులు దర్యాప్తు చేపట్టారు.

ఇవీ చదవండి: