చోరీ సొత్తు పంపకాల్లో లొల్లి.. కత్తితో దాడి

వారందరూ కలిసి దొంగతనాలు చేస్తుంటారు.. చోరీ చేసిన నగదును సమానంగా పంచుకుంటారు. ఈ క్రమంలోనే దొంగిలించిన నగలు పంపకాల్లో తేడా వచ్చింది.. సహచరుడిపై తోటి దొంగలు దాడి చేశారు. తోడుదొంగని చూడకుండా గొంతు కోసి తీవ్రంగా గాయపరిచారు. ఈ ఘటన ఏపీలోని గుంటూరు జిల్లా తెనాలిలో జరిగింది.

చోరీ సొత్తు పంపకాల్లో తేడాలు రావటంతో... సహచరులే యువకుడి గొంతు కోశారు. ఈ ఘటన ఏపీలోని గుంటూరు జిల్లా తెనాలి రైల్వే స్టేషన్ సమీపంలోని గోదాముల వద్ద జరిగింది.

దగ్గుబాటి రాజశేఖర్, శ్రీను కలిసే దొంగతనాలు చేస్తుంటారు. ఈ క్రమంలోనే ఓ చోట అపహరించిన బంగారు గొలుసు పంపకం విషయంలో ఇద్దరి మధ్య గొడవ జరిగింది. రాజశేఖర్ మరో ఇద్దరు యువకులతో కలిసి శ్రీనుపై దాడి చేశాడు. కత్తితో శ్రీను గొంతు కోశాడు. దాడిలో తీవ్రంగా గాయపడిన శ్రీనుని గుర్తించిన స్థానికులు.. పోలీసులకు సమాచారం అందించారు. సంఘటనా స్థలానికి చేరుకొన్న పోలీసులు.. శ్రీనుని తెనాలి ప్రభుత్వ ఆసుపత్రికి తరలించారు. ప్రాథమిక చికిత్స అనంతరం బాధితుడిని గుంటూరు ప్రభుత్వ ఆసుపత్రికి తరలించారు. ప్రస్తుతం శ్రీను పరిస్థితి విషమంగా ఉన్నట్లు వైద్యులు వెల్లడించారు.

వీరు ఎక్కువగా దారిదోపిడీలకు పాల్పడేవారని పోలీసులు తెలిపారు. రాజశేఖర్, శ్రీను పాత నేరస్థులేనని.. పలు చోరీ కేసుల్లో నిందితులుగా ఉన్నట్లు వివరించారు. శ్రీను తాడేపల్లి మండలం వడ్డేశ్వరంకు చెందినవాడని తెలిపారు.

ఇదీ చూడండి:సూర్యాపేటలో స్థిరాస్తి వ్యాపారి దారుణ హత్య