ఆంధ్రప్రదేశ్ వ్యాప్తంగా సంచలనం సృష్టించిన మాజీ మంత్రి వివేకా హత్య కేసు (Viveka murder case) విచారణ ముమ్మరంగా కొనసాగుతోంది. మాజీ మంత్రి వైఎస్ వివేకా హత్య కేసులో (Viveka murder case) కీలక నిందితుడిగా ఉన్న సునీల్ యాదవ్ను సీబీఐ అధికారులు కడప నుంచి పులివెందులకు తీసుకెళ్లారు. పులివెందులలో సునీల్ సమక్షంలో తనిఖీలు నిర్వహించారు. వివేకా ఇంటి సమీపంలోని లోతేటివాగులో సీబీఐ అధికారుల ఆయుధాల అన్వేషిస్తున్నారు. రెండు మున్సిపల్‌ ట్యాంకర్లతో వాగులో నీటిని సీబీఐ బృందాలు తోడేయిస్తున్నారు. సునీల్ ఇచ్చిన సమాచారంతో వివేకా హత్యకు ఉపయోగించిన ఆయుధాల కోసం సీబీఐ బృందం తనిఖీలు చేపట్టారు.
ఈనెల 2న గోవాలో అరెస్టైన సునీల్ యాదవ్ను అధికారులు కస్టడీకి తీసుకుని విచారిస్తున్నారు. సునీల్‌ను 13 రోజులు కస్టడీకి ఇవ్వాలని పులివెందుల కోర్టులో సీబీఐ పిటిషన్ దాఖలు చేసినా...10 రోజులకు మాత్రమే అనుమతి లభించింది. కోర్టు ఆదేశాల మేరకు శుక్రవారం కస్టడీకి తీసుకొన్న సీబీఐ (cbi)… ఈ నెల 16 వరకు విచారించనుంది. శుక్రవారం జైలు ఆవరణలోని అతిథి గృహంలోనే సునీల్‌పై ప్రశ్నల వర్షం కురిపిస్తున్నట్లు సమాచారం.